Shillong, K’Lyngkot 08
Ha ki saw bnai duna, arngut ki nongshnong shnong ka East Jaiñtia Hills ki la duh noh ïa la ka jingim hadien ba ki la shah pynïap dusmon ha ki runar ba la suba ba ki dei na Bangladesh.
Ha ka 11 tarik Nailur, 2023, ka Kong Priskila Suchiang, kaba na Donaskur, East Jaiñtia Hills ka la shah pynïap dusmon bad la suba ba ki briew kiba donkti ha kane ka jingjia ki dei ki nong Bangladesh kiba ju don bynta lang bad ka ha ki kam khaïi pateng ha khappud India-Bangladesh ha katei ka thaiñ.
Ka jaka ba katei ka longkmie ka la shah pynïap ka jngai tang kumba ar kynta na ka shnong Donaskur. Kane ka longkmie kala iehnoh shadien ïa ki arngut ki khun.
Ha katei ka sngi ba ka la shah pynïap, katkum ka jingïathuh jong ki trai shnong, kane ka longkmie lem bad u khun shynrang ki la mih ban ïaid da ka kjat haduh ban da poi ha kawei ka ïing trep kaba katei ka longkmie ka ju shongthait.
Hynrei une u khun jong ka, u la ong ïa la ka kmie ba kan shong shiphang bad ma u un leit wad lynti ban pynpoi ïa ki mar. Hynrei hadien ba u la wanphai sha kajuh ka jaka u la shem pynban ba ka kmie jong u ka la thiah lyngktar ha madan ha ryngkat ka jinglyngkien jong ka snam.
Ha kaba kum kane ka por la ong ba une u khun u la pyrta briew, bad na ka liang ki nongshong shnong ruh ki la wan poi bran bran ha kaba la lap ba ïa ka met jong ka ba la mait dusmon da ka wait ïa ka dur khmat bad na ki kti ki kjat lyngkhot lyngkhot.
Ha kawei pat ka jingjia ha ka 6 tarik Kyllalyngkot mynta u snem, shi kynhun ki nongtuh kwai ïa kiba la suba ba ki dei na Bangladesh ki la wan rung tuh ha kawei ka shnong khappud kaba don ha East Jaiñtia Hills bad pynïap dusmon ia uwei u rangbah da kaba ot lyngkhot lyngkhai ïa ka met jong u, katba uwei pat u lait im.
Kane ka jingjia ka la jia ha kawei ka bri kwai ha Lumsoski, ka shnong kaba jngai tang katto katne kilometre na ka shnong Umkiang.
Une u rangbah dei uba la tip kyrteng kum u Chiang Dhar ïa uba antad ba u la don kumba 50 snem eiei ka rta katba u paralok jong u, uba lait im pat la tip kum u Rahul Pohtam. U Bah Chiang u dei na ka shnong Umkiang katba u Bah Pohtam u dei na Lumsoski.
Utei u lanot u la shah pom da ki kynja wait na ka bynta ka kti, ryndang bad kiwei kiwei ki bynta jong ka met bad u la khlad hapdeng ka jinglyngkien jong ka snam.
La ïathuh ba ki nongshong shnong bad ki pulit ka Umkiang Police Patrolling Post ki la hiar sha kane ka jaka bad pynkit ïa ka met sha Khliehriat Civil Hospital ban leh ïa kaba donkam.
La ong ba kane ka jingjia ka la jia hajan ka ktem jong ki BSF kaba kyrteng Lamasaki kaba jngai tang 500 meter eiei na katei ka jaka ba la shah pynïap utei u rangbah.
