Jowai, K’Lyngkot 8
Ka Khooid Ya Ka Wah Myntdu (KYM) ha ka 8 tarik Kyllalyngkot ha ka jingïalam u Khroo L Pariat President, ka la leit ïakynduh ïa u Bah BS Sohliya, Deputy Commissioner ka West Jaiñtia Hills ban aiti ïa ka kot sakhi ba u Bah Friday Hinge u la dep thep T.5 lak ha ka account kaba la tip kum ka “West Jaiñtia Hills District Environment Protection & Restoration Fund” kaba pynïaid da u DC bad u DFO (Social Forestry) WJHD, Jowai.
Lah ban pynkynmaw ba ka seng ‘Khooid Ya ka Wah Myntdu’ ha ka miet 18 tarik Ïaïong 2023 ka la ïoh bat ïa ki trok bad ka JCB jong u Bah Friday Hinge kiba dang khlong maw beaiñ na ki bynta ka Wah Myntdu bad hadien ka jingïakren sngewthuh jingmut une u kontraktor u la kular ban siew kum ka jingai sngewbha kaba long T.5 lak shi bynta ban pynbha pynmiat ïa ka Wah Myntdu.
Ha kane ka jingïakynduh, ka seng ka la kyrpad ïa u DC ban pyntreikam noh wut-wut ban khlong noh ïa u shyiap uba la pyndap ïa ka Myntdu Mupiah ba tan um ka PHE sha ki longïing ha Jowai bad khamtam ïa kiba bun ki bynta ka Myntdu ba la ïohi ba la pyndap tang da ka khyndew bad shyiap, kumjuh ruh la buh ujor halor ka jingsdang duh noh ka liar pam blah kaba ai um ïa ki lyngkha bad ïa ka Myntdu na ka daw ba pyntuid khyndew u kontraktor ba pyntrei ïa ka Jowai by pass.
Halor kane ka jingpyntuid khyndew u kontraktor sha ki synrang ba tuid sha ki liar, sha ka Myntdu, ka seng ka la dep ïakren manla ki por naduh u DC ka district ba mynshwa, hynrei ka Meghalaya State Pollution Control Board kaba dei ban bishar ban pynshitom ïa u kontraktor kam pat treikam haduh mynta.
U DC ha ka jingïakren bad ki dkhot ka seng, u la kren shai ba un pyntreikam noh mar-mar bad un hukum ha kine hi ki sngi ïa ki magistrate ban leit peit bad un sa pan ha kine ki sngi ïa ka kaiphod treikam na ki tnat sorkar ba dei halor ka Myntdu. Ka seng ka don ka jingkyrmen ba une u DC ba mynta un pyntreikam hok shisha ïa ka hukum ka NGT hashwa ban poi ka aïom slap.
Ka Khooid Ya Ka Wah Myntdu (KYM) ka kyrpad ïa baroh ki nongshong shnong kiba im kiba shong ha ka Myntdu ban ym shaniah tang ha ki bor ka sorkar hynrei ban mih noh shakhmat ban tynrong lem halor kane ka kam im kam ïap.
Ha kane ka sngi la donlang u Bichar Shylla Vice President, Kong Hunbeitki Dkhar Asst General Secretary, Oriland Shylla Treasurer bad kiwei kiwei ki dkhot.
