Shillong, K’Lyngkot 08
Ka seng kieng atiar ka Hynñiewtrep National Liberation Council (HNLC) ka la ïeng beit ha ka nongrim ba ka jingkren ïasuk kan bteng biang tang lada ka Sorkar Kmie bad Sorkar Jylla kin weng ne map noh ïa baroh ki ‘case’ ba la pynngat pyrshah ïa ki nongïalam bad dkhot jong ka seng.
Hadien ba la dep ban aiti ïa ka shithi ban weng noh ïa ka jingïakren ïasuk sha u ksiang jong ka Sorkar Jylla u Bah PS Dkhar, u ksiang jong ka HNLC u Bah Sadon K Blah uba dei ruh u President ka Hynñiewtrep National Youth Front (HNYF) ha ka jingïakynduh bad ki lad pathai khubor ha ka sngi Nyngkong u la ong, “Lada ka Sorkar ka kloi ban weng ne map noh (amnesty) ïa baroh ki kam bymman (case) ba la pynngat pyrshah ïa ki nongïalam bad ki dkhot ka seng, ka lynti ka dang don ba ka jingkren ïasuk kan bteng biang namar ïa ka jingtyrwa la wanrah da ka HNLC naduh kaba sdang, kumta ka jingkhang ka dang plie hynrei lada ka sorkar ka dang kwah ban ïaid katkum ki aiñ, kaba mut kane ka jingkren ïasuk ka lah ban kut noh syndon.”
U Bah Sadon Blah u la ong, ka HNLC ka kwah ba ka dei ban don ka jingpynbeit da ka bor synshar-khadar (political solution) halor ka jingdawa jong ki, kumta dei tang kane ka lynti kaba lah ban bteng hynrei lada pyrshang ban ïaid da ka aiñ, kan nym poi shaei-shaei ruh.
U Bah Sadon u la ong ba u shabi mynta u don ha ka sorkar ym ha ka seng, kumta kan shong eh ha ka sorkar la ka kwah ne em ba ka jingïakren ïasuk kan dang bteng.
U Bah Sadon uba la pynpaw ba un dang bteng beit kum u ksiang, wat lada ka HNLC ka la pynkut noh ïa ka jingïakren ïasuk, u la ong ba ka Sorkar kam dei ban shu bud pyrkhing eh ïa ki lynti ka aiñ (legal process) hynrei ban shim da ka lynti jong ka bor synshar-khadar lada ka kwah ba ka jingïakren ïasuk kan ïaid bad bteng biang.
U la ong ba ka jingweng bad pynkut noh jong ka HNLC ïa ka jingïakren ïasuk ka long namar ka jingmynthi ka Sorkar ban map noh ïa baroh ki kam bymman ba la pynngat ïa ki nongïalam bad ki dkhot.
“Ki don ar bynta hangne, ka mat ka long la ka Sorkar kan pynbeit ïa kane ka jingeh da kaba pyntreikam ïa ka aiñ lane la ka Sorkar kan pynbeit ïa ka jingeh da ka bor synshar khadar. Lada ka ong ba ai ba ka HNLC kan wan bad ka aiñ kan ïaid ha la ka jong ka lynti, kane ka dei ka lynti ka aiñ ïa ka kynhun ba ïaleh thma pyrshah, ïa kaba nga sngew ba kam ïahap satia. Ban ïaid da ka lynti ka aiñ ïa ka kynhun ba ïaleh thma pyrshah, nga sngew ba ka dei ka lynti kaba bakla,” ong u Bah Sadon.
Haba kylli, u Bah Sadon u la ong, kam dei satia ka kam ba ka HNLC ka la shu leh kyrkieh ban shim rai, hynrei ar tylli ki snem ki la ïaid ha ka jingïakren bad u ong ban shim ïa ka rai na ka sorkar ka donkam tang da ki kynta hynrei mynta la ïaid palat 700 sngi.
U Bah Sadon, uba dei ruh u President ka HNYF u la ban jur ruh halor ka jingdonkam na ka bynta ka Sorkar ba kan don ïa ka mon saiñ pyrthei (political will) ba kan pyndonkam da u juh u shabuk ïa ka HNLC kumba la leh ïa ki seng ha ka jingïakhih ILP ha u snem 2013.
Haba pynpaw ba kiba bun ki case pyrshah ïa ki nongïalam ka HNLC ki dei ki kam pynbthei bom, u Bah Sadon u la ong, “Nga kynmaw ba u AK Mishra, uba dei u nongaibuit jong ka tnat MHA ïa ka thaiñ shatei lam-mihngi, ba ha ka por ïakren halor ka jingkyrpad ban weng noh ïa baroh ki kam bymman, u la ong ba kine ki kam kiba la leh da ka HNLC, ym shym la kheiñ satia kum kita ki kam bymman kiba shyrkhei. Kumta lada ki kam bymman kim dei eh kiba heh ne shyrkhei, ka sorkar ka la dei ban weng noh ïa baroh ki case pyrshah na ki nongïalam bad ki dkhot ka seng.
Ha kawei pat ka liang, u Bah Sadon u la ong ruh ba na ka liang ka seng HNYF ruh ka pynrem jur ïa ka Sorkar MDA namar ka jingbym lah ban pynpoi ïa ka jingïakren ïasuk sha ka jingkut kaba ïabeit lang.
U Bah Sadon u la ong ba ka sorkar ka la kheiñ sting palat naba kat kane ka lad ka la ïoh ruh kam lah satia bad bynrap ruh ba ka sorkar ka dei ban weng noh ïa baroh ki case kiba la pynngat khnang ba kan don bad bteng biang ka jingïakren ïasuk.
