Shillong, K’Lyngkot 08
Ka Myntri ka Sorkar Jylla ka Kong Ampareen Lyngdoh ka la ong ba ka sorkar kam donbor ne lah ban mushlia ïa ki rukom pynïaid kam jong ka Lokayukta bad ka la ban jur halor ka jingdonkam ban pynbeit mardor ïa ki jingsngewthuh bakla kiba la mih halor ka mat ba ïadei bad ka jingweng kam ïa ki ophisar.
Haba kren sha ki lad pathai khubor ha ka sngi Nyngkong, ka Kong Ampareen kaba dei ruh ka nongaiktien jong ka Sorkar MDA ka la ong ba ka Lokayukta ka dei ka ophis pyntreikam na ka bynta ki paidbah kiba don kano kano ka jingmudui pyrshah ïa kano kano ka jingtreikam jong kino kino ki nongïalam paidbah bad ïa ka Lokayukta, ki paidbah ki dei ban kynmaw bad sngewthuh ba ka sorkar kam lah ban mushlia ïa ka jingpyntreikam jong ka Lokayukta.
Kane ka jingpynshai ka la wan hadien ba la mih ka jingkynnoh na ka seng Voice of the People’s Party (VPP) ha kaba ïadei bad ka jingweng kam noh ïa ki ophisar na ka Meghalaya Lokayukta, kiba la ong ba ki la don bynta ha ka kam ban sei pyrthei ïa ki kam bamsap hapoh ka Garo Hills Autonomous District Council (GHADC).
Ki ophisar kiba la shah weng ki kynthup ïa u Director of Inquiry and Prosecution, Bah J Rymmai, u IPS ophisar ba la shongthait ryngkat bad u Enquiry-cum-Investigating Officers u Bah R Pde bad u Anil K Sangma.
Ka Kong Ampareen ka la pynshai ba katkum ki kyndon ha ka Lokayukta Act 2014, ka sorkar ka la lap ïa ki jingdkoh ha ka jingjied ïa ki katto katne ki dkhot ka Lokayukta, khamtam kiba dei ha ka kyrdan Director of Inquiry bad ka Director of Prosecution. Kumta ban shimkhia halor kane, ka sorkar ka la phah da ka thup kyrteng ba thymmai sha ka Lokayukta, ka kynhun kaba don pat ïa ka bor laitluid ban thung ne jied ïa ki dkhot jong ka.
Ka la ong ba ka aiñ Lokayukta 2014 kaba la dep ban mynjur bad ithuh da ka ïingdorbar, ka la pynbna paidbah ba yn thung noh katkum ka jingpynïaid jong ka riti synshar ka ri India ïa kata ka Meghalaya Lokayukta, kaba dei ka kynhun kaba la khmih ban thung ha man ki jylla katkum ki kyndon aiñ.
“Kumta ngi dei ban sngewthuh ba na ka liang ka sorkar haba don kano kano ka jingdonkam ban pynbna ïa kita ki dkhot ka Lokayukta, ka sorkar ka lah tang ban phah ïa ki kyrteng sha u Chairperson ne u Khlieh ka Lokayukta bad ka sorkar da lei lei ruh kan nym lah ba kan pynklumar ne pynartatien ïa ka jingpyntreikam jong kane ka Lokayukta ha kane ka jylla,” la ong ka Kong Ampareen.
Katba na ka liang u Bah HM Shangpliang uba dei u nongaibuit ka tnat pule puthi ka sorkar bad ruh u nongaiktien ka seng NPP u la pynshai ba katkum ka Section 10 (2) bad Section 11 jong ka Meghalaya Lokayukta Act, 2014, ki ophisar lane ki nongtrei ki dei ban dei beit na ki tnat sorkar, kumta ki ophisar ba la shongthait kin nym lah satia ban dei ki dkhot jong kino kino ki tnat.
U Bah Shangpliang u la ong, katkum ka aiñ jong ka Lokayukta ka ong ba ym bit ban thung ïa ki briew kiba la shongthait, bad halor kane ka jinglap ba ha u bnai Nohprah, 2023, ka sorkar ka la phah noh ïa ki kyrteng sha ka ophis Lokayukta bad u Lokayukta u la jied ïa kita ki ophisar katkum ka jingsngewbit jong u, bad ka sorkar kam don bor hangne ban thung ïa ki ophisar, dei ka Lokayukta ba la thung.
Shuh shuh u Bah Shangpliang u la ong, ka sorkar ka la leh ïa kaba dei ban leh katkum ba la bthah ha ka aiñ Lokayukta, ym shym don ha kano kano ka bynta ba u Myntri Rangbah ne ka sorkar kiba la donkti ban weng ïa ki ophisar, la pynkynriah noh ba ki dei ki ophisar ba la shongthait.
U la ong ba kito ki ophisar kiba la thung mynshwa ki dei kiba la shongthait na ka tnat Kam Pohïing ka jylla. Kane jingthung kam ka long tang na bynta shipor.
U la ong ba ha ka 19 tarik u Nohprah, 2023, ka ophis jong ka Meghalaya Lokayukta ka la jied ïa u IW Ingty, IAS, kum u Director of Inquiry and Prosecution, ryngkat bad lai ngut ki ophisar MPS ba kynthup ïa u Chalang G Momin, John C Sangma bad u Baniateilang Diengngan kum ki dkhot jong ka.
Ha kawei pat ka liang ka Kong Ampareen ka la ong, “Ngi ai ka jingkular sha ki nongshong shnong ba ka sorkar kam don lynti ban tuklar ïa ka jingpyndonkam jong ka Lokayukta, u Chairman u don ka bor ban thung ïa kita ki dkhot jong ka committee jong u, ka sorkar ka don bynta tang haba phah ïa ki kyrteng.”
