Shillong, K’lyngkot 08
Ka mukotduma ha Ïingbishar Meghalaya High Court ka la khanglad ban pynïaid shakhmat ïa ka jingpyntreikam ïa ka ‘smart meter’ lyngba ka Revamped Distribution Sector Scheme (RDSS)’ jong ka Sorkar Pdeng bad ïa kane ka mukotduma la mudui da kawei ka kompani kaba la shah kynnoh ba ka dei kaba don dak sniew.
Ka kompani BCITS ka la leit ban mudui mukotduma ha Ïingbishar Meghalaya High Court halor ka jingshah pynduh noh ïa ka kontrak ban pyndait smart meter lyngba ka RDSS ha Jane ka Jylla ha ka wat ba-ar.
La ong ba ki don lai tylli ki kompani kiba ïashimbynta ha ka ‘tender’ bad na kita lai tylli la jied ïa ka kompani BCITS.
Hynrei hadien ba la dep jied ïa ka BCITS, la ïoh jingtip ba kane ka kompani ka la don dak sniew bad ka buhrieh ïa ki jingtip haba ïadei bad ka rukom kheiñ ïa ka bai ilektrik.
Kumta hadien ba la ïoh jingtip ba kane ka kompani ka dei kaba thoh bria, ka tnat bording ka la pynduh noh ïa kane kompani bad don jingthmu ban khot ‘tender’ biang da kawei pat.
Kumta namarba ka kam ka dang don ha Ïingbishar, ka Sorkar ruh kam pat leh eiei bad hap ap kham hadien.
Ki don lai tylli ki kompani kiba la ïashimbynta ha ka ‘tender’ kaba la khot ban pyntreikam ïa u smart meter ha kane ka Jylla. Ki kompani kiba ïashimbynta ki long ka BCITS, Genus bad TCIL.
Ha ka jingshisha, la ailad ïa ki kompani ban ïashimbynta ha ka ‘tender’ bad la jied ïa ka BCITS bam pyntrei.
Ka jingthmu jong ka RDSS ka long ban pynjanai ïa ka rukom sam bording sha baroh kiba pyndonkam ilektrik bad ban pynduna ïa ka jingduhnong ha ka AT&C.
La ong ba ki kompani (DISCOM) ba sam bording ne tnat bording ha ki Jylla kin sa lah ban ïoh pisa katkum kane ka skhim (RDSS) na ka bynta ban ïoh ïa ki Pre-paid Smart Metering, bad kiwei kiwei ki jingpynbha kiba ïarap ban pynduna ïa ka jingduhnong.
La ong ba kan don ruh ka jingpynbha bad buh shuh ki sub-station bad ha ki shnong ba dang donkam shuh ïa u transformer yn sa leh ïa kata.
Kumba T.310 klur la mang pat na ka bynta ban pyntreikam smart metre ha baroh kawei ka Jylla.
Ïa kane ka jingmang pisa la mynjur ban ai lyngba ka RDSS.
Ki don ruh kumba 4.6 lak tylli ki longïing ha Jylla kiba dei ban ban ïoh smart meter lyngba ka RDSS.
