Nongpoh, K’Lyngkot 08
Kawei ka longkmie ka la khlad noh ha shen hadien ba ka la shah ban ha ki nar ‘post’ kiba hap na ka jingkylla jong kawei ka trok kaba la jia ha surokbah NH-6 ha Umtrew, Ri-Bhoi District.
Kane ka jingjia ka la jia ha ka Lah Sngi U Blei, ha kaba kawei ka trok kaba don ïa u number JH-CX-4295 kaba kit ïa ki nar ‘post’ kaba dang wan kiew na Guwahati ban wan sha Shillong ka la kylla noh ynda poi ha Umtrew. Ki nar ‘post’ kiba la hap na kane ka trok ki la leit ban noh ïa kawei ka longkmie.
Katkum ka tyllong khubor ba la ïoh lum na ki pulit la ïathuh ba katei ka la jia ha ka por kumba 4 baje janmiet katba katei ka longkmie kaba la tip kyrteng kum ka Cleris Nongsiej, 37 snem ka rta ka dang thmu ban leit phai sha la ïing hadien ka jingwan sngewlem na kawei ka ïing ïap briew kaba don ha katei ka shnong kaba ka dang ïadei bahaïing.
La ïathuh ruh ba katei ka longkmie kaba la ngat ha katei ka jingjia ba sngewsih ka dei kaba la don hynriew ngut ki khun bad kaba dei ruh ka nongtrei jong ka tnat ka koit ka khiah.
Ka tyllong khubor na ki pulit ka la ïathuh ruh ba mar ïa jia katei ka jingjia, u nongñiah jong katei ka trok u la phet krad. Kumta na ka liang ki pulit ki dang pynlong ïa ka jingtohkit halor katei ka jingjia bad ban thwet ban ïoh kem ïa utei u nongñiah ka trok.
Ïa ka met kaba sah jong katei ka longkmie la pynkit noh sha Nongpoh Civil Hospital na ka bynta ban pyndep ïa ki jingdonkam katkum ki kyndon aiñ hashwa ban aiti pat sha ki bahaïing hasem.
