Shillong, K’Lyngkot 08
Ka Mawmluh Cherra Cements Employees Union (MCCEU) ka la ong ba ka dang shaniah ïa ka Sorkar halor ki mat jingdawa jong ka seng bad kam pat shim kano-kano ka rai ban ïaid ha ka lynti jong ka aiñ haba ïadei bad ka jinglong-jingman jong ka karkhana Mawmluh Cherra Cements Limited (MCCL).
“Kum ka seng ngi don bun ki lad ki lynti ban pynurlong ïa ki kam ba ka seng ka thmu ban pynurlong. Ka dang don beit tang kata ka lynti kaba long bad ka aiñ bad kam pat don kano-kano kaba long be-aiñ. Ngi dang rai ban ïaid beit ha ka lynti jong ka aiñ. Hynrei kam pat don kano-kano ka rai kaba ngin rai kulmar,” ong u General Secretary ka seng, Bah Pynskhem Lyngdoh hadien ka jingïalang jong ka seng kaba la long ha ka Lah Sngi U Blei.
U Bah Lyngdoh u la ong ruh ba haduh mynta, ki dang ïeng skhem ha ka nongrim ba ka Sorkar kan pynurlong ïa ki jingdawa jong ki – ka tulop kaba biang bad ki jingsiew kiba sahteng kiba dei ban siew tad ynda ka karkhana ka treikam biang kumba long ha ryngkat ka jingkyntiew kyrdan ïa ka bad ka Voluntary Retirement Scheme (VRS)/Golden Handshake, watla ka MCCL ka la sangeh ïa ka jingtreikam jong ka.
“Ngim pat ïapeiñ halor kine ki mat jingdawa jong ngi,” u la ong.
U President ka MCCEU, Bah Shanlang Diengdoh u la ong ba ka seng katkum ka jingthoh ba la phah sha ka Sorkar ha ka 23 tarik Jymmang, 2023, halor ka mat jong ka VRS ne ka ‘Golden Handshake’, ka kwah ïa ka Sorkar, ban pyntreikam ïa ka skhim ym duna ïa ka 10 snem ne shaneng, ka skhim ka dei ruh ban kdup lang wat ïa ki nongtrei kiba ka samoi treikam ka long kaba lyngkot da kaba wanrah ïa ka skhim ba kyrpang na bynta jong ki, lane lada kim kwah ban jied, dei ban pynkynriah ïa ki sha kiwei-kiwei ki tnad treikam Sorkar.
Katkum ka jingpynsngew ka seng, ka skhim ba la tyrwa, hadien ka jingpynbit pynbiang na ki bor pynïaid ne Sorkar lah ban pyndam da ki nongtrei, lada ki jingkhmih lynti jong ki ne ka jingtyrwa pisa kam long kaba biang, kumta ka skhim kaba wanrah ka dei ban siew shisien siew bad baroh ki jingsiew ba dang sah, dei ban pynkhuid noh hashuwa jong ka tarik ba la buh.
U Bah Diengdoh u la ong ruh ba dei ban kyntiew kyrdan ïa ka karkhana khnang ba ka lah ban ai biang ka jingshakri kaba neh slem sa shisien. U la kyrpad ïa baroh ban ym kynthoh ïa ki dkhot jong ka MCCEU naba ki mad bun ki jingeh na shane-shatai.
U la ong ruh ba ka jinglong-jingman jong ka karkhana kumba ka long mynta kam dei ka jingkitkhlieh tang jong ki nongtrei.
“Ngi long ki jingdon-jingem jong ka. Ïa mynta ngi ïaksaid shuwa ïalade tang ban ïoh ïa ka bam. Ngi don ki jingkitkhlieh ban khmih ïa la ki jong ki jong ki longïing,” ong u Bah Diengdoh.
Na ka liang ka MCCEU ka la kyrpad ïa ka Sorkar Jylla ban ïarap pynïaid biang ïa ka karkhana lyngba kino-kino ki lynti khnang ba ka lah ban ai kam ai jam.
U President u la ong ruh, “Lada ka karkhana ka sdang biang ka jingtreikam jong ka, kan ïarap ïa ka Sorkar ha ka liang ka ai kam ai jam.”
Halor ki jingkren ba dang shen jong u Myntri Rangbah, u Conrad K. Sangma ba ka Sorkar la kumno-kumno ka la poi hi sha ka rai ha ryngkat kito kiba don bynta, lem bad ki nongtrei ba kan ïaid shakhmat bad ka VRS/’Golden Handshake’ bad ki nongtrei bapura jong ka MCCL, u Bah Diengdoh u la ong ba watla ki la phah ïa ka jingthoh ha ryngkat ki kyndon halor katei ka bynta, hynrei kam pat shym la don kano-kano ka jingpynsngew na ka liang ka Sorkar.
