Shillong, K’lyngkot 08
Ka jingjia ba kemding ka ïing ha Khyndai Lad ha ka jingpluh kaba shyrkhei ka la jan dap lai bnai mynta, hynrei ki bor district ka East Khasi Hills kim pat lah leh eiei bad ki dang ap ïa ka kaiphod kaba tikna la katei ka jingtei ka dang skhem ne ka donkam ban pynpra noh.
Kum ban pynkynmaw, ka jingpluh ka la jia ha ka 14 tarik Risaw, 2023 bad ka ding kaba klang ka la bamduh ïa ki jingdon jingem hapoh ïing naduh ki jaiñ bad ki shuki ki miej kiba la buh ha ki kudam. Uwei u briew ruh u la khlad ha kane ka jingpluh ding.
Kham hashwa, la thung ïa ka jingtohkit da u majistor bad la phah ïa ka kaiphod tohkit sha ka DC ka East Khasi Hills district ha kaba la ai jingmut ban pyndonkam da kiba kham shemphang ban batai shaphang ka jinglong jingman jong ka ïing kaba la pluh bad shah pynjulor ha ka ding.
Nalor kane, la phah peit bniah ruh ha ka National Institute of Technology, Meghalaya bad kane ruh kam lah ban pynkut hynrei la ong ba ka jinglap jingshem kam pat long kaba biang bad ym pat lah ban pynkut.
La ong ba ka NIT Meghalaya kam pat ai kano-kano ka jingmut kumno yn leh ïa kane ka ïing mala kaba la shahktah lut ha ka ding.
Ka tyllong khubor ka ïathuh ba na ka liang u trai jong katei ka ïing mala kaba pluh, u la dep phah ban peit bniah da ka IIT Guwahati bad na ka liang ki bor district ruh ki ap lang ban ïohi ïa kane ka kaiphod.
Ha ka jingshisha ka bor district East Khasi Hills ka la dei ban thoh hi sha ka IIT Guwahati ba kan ïarap ban ai lem ka kaiphod kumba la dep phah peit bniah da u trai.
Ka don ka jingsyier ïa kane ka ïing mala namarba ka ding ka la pynjulor baroh kawei ka ïing bad ym pat lah ban tip la yn pynpra noh ne em ïa katei ka ïing mala ne ka dang long kaba shngaiñ lada ieh beit kumto.
La ong ba kane ka ïing dewbilat kaba jrong bad don bun mala, ka don ruh bun tylli ki kudam hapoh jong kane ka ïing. Ïa kane ka ïing la dei trai da u hehspah u bym dei u trai muluk.
