Shillong, K’Lyngkot 08
Ka jingdheng kali kaba jan man ka sngi namar ka jingmaramot ïa ka jing-kieng Umïam ka la pynlong ïa u MLA ka Voice of the People Party (VPP) na North-Shillong, Bah Adelbert Nongrum ban ai jingmut ïa ka Sorkar Jylla ban pyndonkam noh da ka ‘Sub-Road’ kaba don ruh ïa ka jingkieng nar barim na bynta ban ïaid ki kali rit.
U Bah Nongrum u la leit ban jurip hi dalade ïa katei ka jingkieng nar barim ha ka Lah Sngi U Blei.
“Ngam kwah ba kum u nongmihkhmat ngan shu long tang u nongpeitkai ne ban khmih lynti ba ka Sorkar kan leh lut nadong-shadong (hynrei ka dei ka kamram bad jingkitkhlieh ka Sorkar) bad kum u nongmihkhmat…hooid ngi don ha ka liang pyrshah, ngim lah ban shu pyrshah, hynrei ngin hap ai jingmut,” ong utei u MLA.
U la ong ruh ba ka jingwan jurip jong u ïa katei ka jaka, ka long ban khmih la ka long ne em ban ïaid kali – tang ki kali rit khlem da kheiñ ïa kiwei pat ki kali.
Haba pynsngew ïa ka jingïaid lynti jong u naduh Mawïong, u la ong, “La jan 2 kynta na Mawïong ha Umïam…katno ka ktah ïa u paidbah man ka sngi khamtam kiba beh sha ki kad lynti rel, kad liengsuiñ bad kiwei-kiwei ki kam ba kyrkieh kum ka pang ka shitom.”
Katei ka jingkieng nar barim ka ïaid lyngba ka Rapsang Group of Industries bad ka mih mar pyrshah ka Jackwell Pump.
“Kane kan long ka jingïarap shi kat dei na bynta ki nongleit nongwan. Nga ngeit skhem ba ka MePGCL kan leh la ka jong ka kamram, kan phah ki ‘riewshemphang ba la pyntbit jong ka ban ai jingmut sha ka Sorkar,” u la ong.
Ha kajuh ka por, u la kyntu ïa ka tnad bording ban shimkhia kyrkieh ha ka ban thew ban woh la ka long ne em kaba biang ban pyllait ïa ki kali rit ban ïaid na katei ka jingkieng.
Na ka liang utei u MLA u la ai burom ruh ïa u nongmihkhmat barim ka Umroi, Bah George B. Lyngdoh uba la shimkhia ban rah ïa katei ka mat hapoh ïingdorbar kumjuh ïa u nongïalam ba rangbah ka VPP, Bah Ardent M. Basaïawmoit uba la shimkhia lang ïa katei ka mat.
“Kaba sngewsih ka long ba nalor ba la tip ba ka jingim jong kane ka jingkieng (Umïam) ka la kut, ka Sorkar kam dei ban ap lehse mynta i long ki jingeh iba rit, lehse ka thaw sniewbok ïoh jia eiei, mano ban shim ka jingkitkhlieh,” la ong utei u nongmihkhmat.
Shuh shuh u Bah Nongrum u la ai khublei ïa ka tnad pulit pynïaid kali kaba la pyndep la ka jong ka kamram watla u la ban jur ba kan nang pynkhlaiñ shuh-shuh ïa ka jingtreikam naba bun bah ki kali ki ïaknieh iwei-ïa-iwei ha shi lynter ka surok shuwa ban poi ha jingkieng Umïam.
Utei u MLA u la phah jingthoh ruh sha u Myntri ka tnad bording, u A.T. Mondal halor katei ka bynta.
