Jowai, K’Lyngkot:
Ka Indian Red Cross Society (IRCS), West Jaiñtia Hills ka la sam ei da ki kymbor sha ki katto-katne ki longïing ha kaba ïa kane ka kam la pyndep da ki ‘Life Member’ jong kane ka seng ba don ha ki shnong ki thaw bapher-bapher.
U Bah Oriland Shylla, Life Member IRCS, West Jaiñtia Hills u la ïathuh ba ïa katei ka kam la leh ha ka thong “Distribution of Humanitarian Aid”.
Ha ka jingïalang lyngkot kaba la long ha ka 6 tarik Kyllalyngkot ha ïing treikam ha Chilliangraij Dorbar Shnong, shuwa ban aiti ïa ki kymbor sha ki longïing kiba duna ka ïoh ka kot, u Bah Shylla u la batai shaphang ka IRCS kum kawei na ki seng kaba don ha shityllup ka pyrthei kaba ïeng ban shakri ïa ki paidbah ha ki rukom bapher-bapher khamtam haba don ki jingjia ki bym poi pyrkhat (Calamities & Accidents) bad u la kyntu ruh ïa ki nongshong shnong ban ïadon bynta bad kane ka seng.
Ïa kane ka prokram la pynlong ha ka jingdonlang ki dkhot ka Chilliangraij Dorbar Shnong ba kynthup ïa u Bah Cheini Niangti, Convener Auditorial Board bad u Bah Heisar Shylla, Asst. General Secretary Chilliangraij Dorbar Shnong, Jowai.
