Nongpoh, K’lyngkot:
Kumba ju long manla u snem, ka Raid Marwet ryngkat bad ki khun ki hajar mynta ka kynti ruh ka la rai ban pynlong biang ïa ka jinglehniam Sohjer ha 9 Mer Baridua kum shi bynta ban ainguh aidem da ka kñia ka khriam ïa U Blei nongbuh nongthaw hashwa ba kin ïoh ban bam ïa u soh nyngkong jong u Kba u Khaw uba ki la trei shitom ha une snem ba la dep bad ruh ban duwai phirat ba Un nang kyrkhu ban im pahuh pahai ha une u snem ba thymmai ha baroh ki liang.
Haba kren sha ki lad pathai khubor ha ka Lah Sngi U Blei, u Pa’iem Ken Syiem, Syiem ka Raid Marwet ha ryngkat ka jingïadon lang kiwei ki nongïalam Raid bad longkmie, u la ïathuh ba kane ka lehniam Sohjer ka dei ka leh niam leh rukom jong ka Raid Marwet kaba ju pynlong shisien ha ka shisnem. Mynta ka kynti, ïa kane ka lehniam yn pynlong ha ki saw sngi lynter, kata naduh ka 17 tarik ter ter bad pynkut ha ka 20 tarik u bnai Kyllalyngkot. Ïa kane ka jinglehniam yn pynlong ha madan kaba don ha 9 Mer Baridua, Ri Bhoi District.
U Pa’iem Ken Syiem u la pyntip ruh ba ka jingpynlong ïa kane ka jinglehniam kaba kyrpang jong ka Raid ka long ruh kum shi bynta ban pynneh pynsah ïa ka riti dustur jong ka Raid kaba la buh da ki menbarim naduh hyndai hynthai bad kaba la sdang ban duh jait kat nang ïaid ki snem ki por.
Ban pynshongshit bad pynbyrngia ïa ki paidbah kiba wan ban sakhi ïa kane ka lehniam Sohjer, u Syiem ka Raid Marwet bad ka Komiti Sohjer, nalor ka lehniam Sohjer, ki la rai ruh ban pynlong ïa ki jingïakop bapher bapher, ka rwai ka put kaba yn wan ban ïashim bynta da ki nongrwai ba pawnam na ka jylla bad ruh ki nongrwai ba pawnam na ka karkhana Bollywood.
Halor kane ka bynta, u Pa’iem Ken Syiem, nongïalam ka Raid lem bad ki longkmie, ki khot ki wer sngewbha ïa baroh ki paidbah ka jylla ba kin wan ban sakhi ïa katei ka jinglehniam kaba shisien shisnem jong ka Raid Marwet ha kaba kin don ruh shibun ki dukan kiban die ïa ki jingbam tynrai bad kiwei kiwei de na ka bynta ki paidbah nongwan peitkai.
