Bengaluru, K’Lyngkot 09 (UNI)
Ha kawei ka jingjia kaba la pynsuhjer ïa kiba bun, kawei ka longkmie ka la shah kem noh ha ki pulit halor ka jingsuba ba ka la pynïap ïa la u jong u khun uba dang saw snem ka rta ha Goa.
Katei ka briew kaba la shah kem ka dei kaba la tip kyrteng kum ka Suchana Seth, 39 snem ka rta, bad kaba long ka Chief Executive Officer (CEO) jong kawei ka kompani ba dang thymmai.
La kynnoh ba katei ka briew ka la pynïap ïa la u khun ha Goa katba ka la shah kem pat ha ki pulit ka Chitradurga ha Karnataka ha ka miet Sngi U Blei. Hynrei haduh mynta, ym pat lah ban sngewthuh na kaei ka daw kaba pynlong ïa ka Suchana ban pynïap dusmon ïa la u khun.
Katkum ka jingthoh ba ka la buh ha LinkedIn, ka Suchana ka la batai ba ka dei ka CEO jong ka Mindful AI Lab bad ka la long kawei na kita ki ‘100 Brilliant Women in AI Ethics for 2021’ lane kawei na ki kynthei kiba shemphang ha ka ‘Artificial Intelligence Ethics 2021’
Ki pulit jong ka Goa, la ïathuh ba ha ka 6 tarik Kyllalyngkot, ka Suchana ka la leit ha kawei ka ïing basa kaba don ha Candolim ha North Goa ryngkat bad u khun jong ka.
Hadien ba ki la sah ar sngi ha katei ka ïing basa, ki pulit ki la ong ba ka Suchana ka la kyrpad ïa ki nongtrei ka ïing basa ba kin pynbiang ïa kawei ka kali kamai ba kan leit sha Bengaluru. Hynrei kita ki nongtrei ki la ai jingmut ïa ka ba kan shim da ka liengsuiñ namar ka kham shong tad ban ïa kaba leit da ka kali kamai, la ong ki pulit.
Tangba ka Suchana ka la ong beit ïa kita ki nongtrei ba ki dei ban pynbiang da ka kali bad namarkata, ma ki ruh ki la leh kumba ka la bthah.
Kham hadien ynda ka Suchana ka la mih na ka ïing basa, ki nongtrei ki la leit ban pynkhuid ïa ka kamra ba ka la sah bad u khun. Ha ka por ba ki dang pynkhuid, ki la lap ïa kawei ka jaiñ ñiad kaba la bit snam. Mar kumta, kita ki nongtrei ki la pyntip sha ki pulit ka Calangute kiba la wan mar-mar sha katei ka kamra.
Kita ki nongtrei ki la ïathuh ba ki khlem ïohi satia ïa u khun jong katei ka longkmie ha ka por ba ki la kiew ha ka kali, bad ka la rah ruh bad ka ïa kawei ka pla kaba khia.
Na ka liang ki pulit ki la ïakren bad ka Suchana lyngba ka ‘phone’ bad ki la kylli na ka ïa kata ka snam kaba la bit ha ka jaiñ ñiad bad kumjuh ruh halor u khun jong ka.
Ki pulit ki la ong ba ka Suchana ka la ïathuh ba ka jingbit snam ka dei namar ka jingpoi bnai ka jong ka katba u khun jong ka, u don ha kawei ka ïing ha Margao bad ka la ai ruh ïa ka kyrteng jong kata ka jaka.
Ki pulit ka Calangute ki la pyntip ïa ki pulit ka Fatorda shaphang kata ka jaka, hynrei ynda la leit wad, la shem ba kam don satia kaba kum kata ka jaka.
Mar ïa tip ba ka la thok, ki pulit ka Calangute ki la ïakren bad u nongñiah ïa kata ka kali kamai kaba la don ha lynti ban leit sha Chitradurga. Ki pulit ki la bthah ïa uta u nongñiah ba un leit beit sha ka thanat pulit kaba don hajan tam.
Uta u nongñiah u la leit rung ha thanat Chitradurga bad ynda ki pulit ki la peit ïa ka pla jong ka Suchana, ki la shem pynban ba la thep da ka met kaba sah jong u khun jong ka.
Na ka liang ki pulit ka Calangute ki la leit sha Chitradurga ban shimti ïa ka Suchana katba ïa ka ‘post-mortem’ halor ka met kaba sah jong u khun jong ka yn pyndep ha Chitradurga.
