Shillong, K’lyngkot 09
Ka Akhil Bharatiya Vidyarthi Parishad (ABVP) kaba dei ka kynhun jong ki samla pule ka Ri India baroh kawei kiba ïatreilang na ka bynta ka bit ka biang jong ki samla, ka pule puthi bad ki jingdonkam ki samla baroh kawei ka la pynlong ïa ka 69th National Conference naduh ka 7 tarik haduh ka 10 tarik u Kyllalyngkot ha nongbah Delhi bad ha katei ka National Conference u Myntri ka tnad ki kam pohïing ka Ri, u Amit Shah u la long kum u kongsan.
Haba kren sha ki lad pathai khubor ha Shillong Press Club ha ka Sngi Ba ar, ka samla Nibiang Sumer kaba dei ka Central Working Committee Member, ka la ong ba ka jingpynlong ïa katei ka 69th National Conference ka long ban rai lane ai jingaimut na ka bynta ka jinglong jingman ka pule ka puthi bad kiwei kiwei ki jingdonkam ki samla pule.
Katei ka samla ka la ïathuh ruh ba ha katei ka National Conference la kyntu ïa ki samla ka ri ba kin sumar ïa ka met ka phad lade da kaba ki leh kilan met ba kin ym ngop satia ha ki jingmlien kiba sniew kum ki jingdih pynbuaid bad kumjuh ruh ban ri ban da ïa ka mei-mariang.
“Ha kane ka 69th National Conference, ngi la kyntu ïa ki samla ka Ri ba kin bam ïa ki jingbam kiba tei ïa ka met ka phad bad ba kin kiar na kino kino ki jingdih pynbuaid da kaba ki leh kilan met khnang ba ka Ri bad ka imlang ka sahlang kan long kaba imsuk imsaiñ bad ka jinglong jingman jong ka jingim ki briew kan long kaba ïaid beit ïaid ryntih”, la ong ka samla Nibiang.
Ka samla Nibiang ka la pyntip ruh ba naduh ka 12 tarik haduh ka 23 tarik u Kyllalyngkot 2024, ka ABVP kan sa pynlong ïa ka Youth Week bad ha katei ka Youth Week kin sa don shibun tylli ki jingïalehkai bapher bapher.
“Kumba phi tip hapoh ka jylla Meghalaya kata hapoh Rilum Jaiñtia, ki don shibun tylli ki kolej hynrei hadien ka jingpyndep ïa ka Graduate, shaei ki khynnah pule kin leit bad kumba ka long mynta, ym don satia ki skulbah jong ka sorkar hapoh Rilum Jaiñtia la ka long ha East Jaiñtia ne ha West Jaiñtia ruh kumjuh, kumta ngi kum ki khynnah pule ha kaba ïadei bad kane ka mat ngi la long kiba la pynkhreh bha ban ïakren”, la ong ka samla Nibiang.
Ka la ong ruh ba ha katei ka Youth Week jong ka ABVP kin sa don ruh ki jingïakren ha kaba ïadei bad ki jingeh jong ka pule ka puthi bad kaba kham kongsan eh ka dei ka jingeh hapoh ka jylla kata ha Rilum Jaiñtia ba ym don satia ki skulbah hapoh katei ka thaiñ bad kane ka wanrah jingeh shikatdei eh ïa ki samla ka thaiñ bad kum ki samla jong kane ka juk kaba mynta kin ïakren sani bha halor kane.
Na ka liang u Tengku M Marak, State Secretary ABVP Meghalaya u la ïathuh ba ha katei ka Nation Conference ki don haduh kumba 10 hajar ngut ki samla pule bad kiwei kiwei ki dkhot kiba la ïashimbynta ha katei ka Conference na kylleng ki jylla jong ka Ri.
U la ïathuh ba napoh ka jylla Meghalaya ki don kumba 100 tam ki khynnah pule kiba la wan ban ïashimbynta ha katei ka Conference bad manla u snem ki khynnah pule ka jylla Meghalaya ki ju wan ïashimbynta ha katei ka 69th National Conference.
