Khliehriat, K’Lyngkot 09
Ar ngut ki nongïalam shnong ki la shah mait da u sdie haduh ba kin da mynsaw jur. Kane ka la jia ha ka miet 3 tarik Kylla-lyngkot ha ka shnong Tuber Kmaishnong, East Jaiñtia Hills District.
Kine ki nongïalam shnong ki kynthup ïa u Waheh Shnong Tuber Kmaishnong u Bah Micky Lyngdoh bad u Bah Denis Lyngdoh kum Secretary ka IVCS uba long ruh u Chairman Seiñraij Shnong Tuber Kmaishnong.
Katkum ka ejahar ba la mudui da u para u Waheh Shnong u Bah Chelang Lyngdoh ha Ladrymbai Police Outpost ha ka 4 tarik mynta bnai, la ong ba kane ka jingjia ka la jia ha ka por 11.30 mynmiet ha ka 3 tarik Kyllalyngkot ha ka por ba u Bah Micky bad u Bah Denis ki dang thmu ban pynjaijai ïa ka jingkulmar hapoh shnong Tuber Kmaishnong, ka jaka kaba la tip kum ka Kamar Khlot, hynrei kyndit kynsan ki la shah thombor pynban.
Kine ki nongïalam shnong ki la shah thombor ha u briew uba kyrteng Training Phawa na kawei ka kali Hyundai Creta ronglieh kaba don u number ML10-C-5037 ryngkat bad u sdie u la thombor naphang bad kawang ïa kine ar ngut haduh ban mynsaw jur.
La ïathuh ba u Bah Denis u la shah kawang na ka bynta ka khlieh bad u la kyllon hajuh bad um tip briew shuh.
U Bah Chelang ha ka jingujor u la ong ba kane ka jingjia la suba ba ka jingthmu hi ka long ban pynïap ïa baroh ar ngut kine nongïalam shnong. Ïa kine baroh ar ngut la pynkit noh mar-mar sha Civil Hospital, Ialong hadien pat la pynkynriah sha Supercare Hospital, Shillong ban ïoh ïa ka jingsumar kaba kham biang.
