Shillong, K’lyngkot 09
La jan san bnai ka la ïaid mynta naduh ba ka Kynhun Myntri ka la ai jingmynjur ban wad lad ban sdang noh ïa ka jingpule doktor ha lai tylli ki jaka, kata, ha Shillong, Tura bad Ri Bhoi district, hynrei haduh mynta, ka Sorkar kam pat lah ban pynbit pynbiang ïa ki jingdonkam bad ka lah ban dang kham shimpor ban sdang ïa ka jingpule.
Ha u Nailar jong u snem ba la dep, ka Kynhun Myntri ka la ai jingmynjur ban sdang noh ka jingpule doktor ha Jylla da kaba pyndonkam ïa ki jaka sumar kiba la don lypa kum ha Shillong Civil Hospital, Ganesh Das Hospital nalor ka jaka pule doktor ha USTM ha Ri Bhoi District.
La ong ba ki nonghikai kiba la don lypa naduh ki Specialist Doctor bad kiwei kiba lah ban long ki nonghikai khamtam ha kine ki jaka sumar kiba la don lypa kum ka jingsdang noh ha kaba la pynkhreh ban sdang shwa 50 ngut kiba pule doktor ha Shillong.
Haba ïadei bad ka Tura Medical College kaba dang ïaid ka jingtei jingshna, ka tnat ka koit ka khiah kan sa shim rai haba ïadei bad ka jingtreikam ka Tura Medical College naduh ka jingïoh ïa ki nonghikai lyngba ka PPP kaba don ka jingïateh bad ki jaka pule doktor ki bym dei na kane ka Jylla.
Ka tyllong khubor ka ïathuh ba ka Sorkar Jylla ka dang wad lad kumno ban pynbit pynbiang ban ïoh sdang noh ïa ka jingpule doktor bad ka Sorkar Jylla ka dei ban phah pisa sha ka National Medical Commission (NCM).
La ïathuh ba ka Myntri ka koit ka khiah ka Kong Ampareen Lyngdoh kan sa lum jingïalang ban ïakren ïa kane ka kam kaba donkam khnang ba ka Jylla kan ïoh ban pynmih kham bun ki doktor ki ban ai jingshakri ha ki jaka sumar ha kane ka Jylla.
Ka Meghalaya ka dang hap shaniah ban phah ïa ki samla ban leit pule doktor shabar Jylla namar bym pat don ki jaka pule doktor.
