Shillong, K’lyngkot 09
Ka jingleit ai jingkyrshan u MDC ka UDP na Nongpoh konstitwensi Bah Balajied Rani ïa ka Executive Committee ba la ïalam da ka NPP bad Congress ha Khasi Hills Autonomous District Council (KHADC), ka jingkylli mynta ka long hato u MLA ka UDP ba mynta na Nongpoh un leit rung lang sha ka seng NPP?
Ka jingkyrshan u MDC ka Nongpoh ïa ka NPP ha KHADC ka dei ha ka por ban ïakheiñ khlieh briew hapoh ka ïingdorbar ban pynkylla ïa ka Khasi Custom Lineage Bill 2023 ha ka 22 tarik u Nohprah 2023, katba ki MDC ka UDP kiba shong ha ka liang pyrshah kim shym la ïeng namar kim sngewïahap.
Wat la ki nongïalam ka UDP ki kyntait ba u Bah Balajied u leit ai jingkyrshan ïa ka NPP namar ki aidaw ba u kyrshan ïa katei ka Bill ha ïingdorbar naba ka pynmyntoi ïa ki paidbah ka thaiñ Ri Bhoi hynrei ki MDC ka NPP ki la dep pynthikna ba u Bah Balajied u la ai jingkyrshan ïa ka NPP ha KHADC.
Katkum ka khubor ba la ïoh lum jingtip, ba u MDC um nud ban leit ai jingkyrshan ïa ka NPP khlem da ïoh jingbit na u MLA ba mynta Bah Mayralborn Syiem.
Ki khubor ki ïathuh ba ha kine ki sngi ka la don ka jingïakren ba u MLA ka UDP na Nongpoh un rung noh sha ka NPP. Namar ka aiñ kam shah, kumta u la nang phah noh ïa u MDC ba mynta Bah Balajied ban kyrshan ïa ka NPP ha KHADC.
Ka jingpynskhem ïa kane ka jingïadei hapdeng u Bah Mayralborn bad ka NPP ka dei namar ha ka por ba u dang dei u MLA ka Congress hashwa ban rung sha ka UDP u la dang phah lypa ïa u MDC ba mynta Bah Balajied bad hadien pat u sa leit rung ïalade sha ka UDP.
Ha kane ka kynti ruh katkum ki dak ki shin ïa ka jingleh u MDC ba mynta Bah Balajied Rani ka lam shata ba u MLA ba mynta Bah Mayralborn u lah ban rung sha ka NPP ynda la dei ka por.
Shwa ban sdang ka dorbar ha u Nohprah 2023, la ïohi ba ar ngut ki MDC ka UDP, u Bah Lambor Malngiang bad u MDC shu sieh Bah Bindo M Lanong kiba dei ki kyrtong kiba la ïakhun pyrshah ha ka MLA ilekshon ha Nongkrem konstitwensi ki la leit kyrshan ïa ka NPP ha KHADC hapoh ka jingïalam u Bah Pynïaid Syiem kum CEM.
