Shillong, K’lyngkot 09
U MP ka Shillong u Bah Vincent H Pala u la ong ba ka long kaei-kaei kaba diaw ba ka HNLC ka hap ban weng noh na ka jingïakren ïasuk bad kane ka jia namarba ka Sorkar BJP ha Delhi bad ka Sorkar Jylla kim shimkhia wat haba ka seng ka la kloi ban wan hi dalade sha ka miej ïakren.
U Bah Pala u la pynpaw ïa kane haba ki nongthoh khubor ki buh jingkylli kaei kaba ka Congress ka don ban pynpaw haba ïadei bad kane.
U la ong ba ka HNLC ka la long kaba kloi dalade hi ban wan sha ka jingïakren hynrei ka Sorkar Pdeng bad Sorkar Jylla kim shimkhia.
U la ong ba kum ka seng kaba don ha liang pyrshah kam da don jingtip eh kumno ka ïaid ka jingïakren naduh basdang namarba ka Sorkar ruh kam khot ban phylliew jingmut lang bad ban ïatai kum ïa kane ka mat kaba kongsan.
U la ong ba ka Sorkar BJP ha Delhi ka shu pyni kumba shimkhia hynrei kam leh kumba long ka soskular bad ka NSCN (IM) ruh ka shu kut tang ha ka ‘framework agreement’ haduh mynta, ka jingpynkylla ïa ka Sixth Schedule ka shu sah kumto, bad ïa ka BJP la tip bha ba ka dei kaba kloi ban kular bad kam pynurlong.
“Kum ka seng, ngi kyrshan ban don ka suk ka saiñ bad ngim lah satia ban duh ïa kata ka lad tang namar ka jingpyni jingsarong (ego),” la ong u Bah Pala, uba la kyntu ruh ha kajuh ka por ïa ka HNLC ban nym pat sangeh ban wan sha ka jingïakren.
Haba kylli halor ka jingmap noh ïa ki kam runar ïa ki nongïalam ka HNLC, u Bah Pala u la ong ba ka jingwan ban shu pyndem bad ka jingwan na ka bynta ban ïakren ïasuk ka ïapher namarba kaba wan ban ïakren ïasuk ka dei kaba hap pyrkhat bha kumno ki long ki kyndon bad kumno ban pynjynsur, hynrei imat ka Sorkar kam shimkhia.
U Bah Pala u la ong ruh ka Sorkar MDA la ka dei ka MDA-1 ne MDA-2 ki don ki jingkular kiba khlem urlong.
U la ong ki kular ban pynmih kam 5 lak tylli hynrei ym ïohi bad ki kular ban ïoh tih dewïong hynrei ka khlem urlong ha kine ki san snem bad mynta ruh.
“Ha ka jaka ban ïohi ïa ka jingsdang tih dewïong ngi ïohi pynban ïa ki karkhana thang dewïong (coke plants) bun tylli. Ki rai kiba ki shim dei tang na ka bynta ka pisa,” u la ong.
U Bah Pala u la ong ruh dei na ka daw ka jingsngew sarong jong kito kiba don ha ka Congress ha ki snem ba la leit, ka la plielad biang ïa ka NPP bad ki paralok jong ka ban thaw Sorkar biang sa shisien.
U la ong ruh ba ka Sorkar MDA kam lah satia ban bat ïa kaei kaba ka kular bad pynurlong kumba la khmih lynti ki paidbah ha bun ki liang.
