Panaji, Goa, K’Lyngkot 09
Na ka jingtohkit ba malu-mala ki pulit ka Goa, la ong ba ka longkmie ïa kaba la suba ba ka la shim noh ïa ka jingim jong u khun lajong, ka la pyrshang ruh ban pynïap hi ïalade.
Ki pulit ka Goa ki la kem ïa ka Suchana Seth na Chitradurga kaba don ha Karnataka ha ka Lah Sngi U Blei bad la wanrah ïa ka sha Goa ha ka Sngi Ba-Ar, bad na ka liang ka ïingbishar ka la ai por hynriew sngi ïa ki pulit ba kin tohkit ïa ka.
Katei ka longkmie kaba la don 39 snem ka rta bad kaba dei ka CEO jong kawei ka kompani bathymmai, ka la shah kynnoh ba ka la pynïap ïa la u jong u khun ba dang saw snem ha kawei ka ïing basa ha Candolim. Kine ki shi kmie shi khun ki la sah ha ka ïing basa naduh ka 6 tarik Kyllalyngkot. Ki pulit ki la ong ba hadien ba katei ka longkmie ka la pynïap ïa la u khun, ka la pyrshang ruh ban pynïap noh ïalade da kaba ot na kti kadiang da ka tiar ba nep.
Haduh mynta, kam pat shai na kaei ka daw ka Suchana ka la pynïap ïa la u jong u khun, hynrei kane ka longkmie ka la ïathuh ha ki pulit ba ka la ïashong khlad bad la u kurim bad ka jingïapyllait san shyieng ka dang ïaid shakhmat.
Ki pulit ki la ong ba ka snam ba la lap ha ki jaiñ ñiad ha ka ïing basa ki dei ba la jaw na ka kti jong ka Suchana ha ka por ba ka la pyrshang ban pynïap ïalade.
Ka jingsuba ba katei ka longkmie ka la pynïap ïa la u khun ka long ha ka por ba ki nongtrei katei ka ïing basa ki la leit pynkhuid ïa ka kamra ba ka Suchana ka la sah bad u khun. Haba ki dang pynkhuid ïa ka kamra, ki la lap ïa kawei ka jaiñ ñiad kaba la bit snam. Kita ki nongtrei ki la pyntip sha ki pulit ka Calangute kiba la wan mar-mar sha katei ka kamra.
Nalorkata, ki la ïathuh ba ki khlem ïohi satia ïa u khun jong katei ka longkmie ha ka por ba ki la kiew ha ka kali, bad ka la rah ruh bad ka ïa kawei ka pla kaba khia.
Ki pulit ka Calangute ki la ïakren bad u nongñiah ïa kata ka kali kamai kaba la don ha lynti ban leit sha Chitradurga. Ki pulit ki la bthah ïa uta u nongñiah ba un leit beit sha ka thanat pulit kaba don hajan tam.
Uta u nongñiah u la leit rung ha thanat Chitradurga bad ynda ki pulit ki la peit ïa ka pla jong ka Suchana, ki la shem pynban ba la thep da ka met kaba sah jong u khun jong ka.
Ha ka por ba katei ka la jia, u kurim jong ka Suchana u la don ha Jakarta ha Indonesia, bad u la wan poi noh sha India hadien ba ki pulit ki la pyntip ïa u halor ka jingshah pynïap u khun.
