Jowai, K’Lyngkot 09
Ar ngut ki briew ki la shah kem noh ha ki pulit halor ka jingsuba donkti ban pynïap ïa u Shanbormi Lamare na ka shnong Barato A Pynthor, katba uwei na ki suba u la wan pyndem hi dalade hakhmat ki pulit ka thanat Jowai ha ka 9 tarik Kyllalyngkot.
Kitei ar ngut kiba la shah kem la tip kyrteng kum u Jar I Dkhar, 31 snem, uwei uba dang 18 snem bad uba wan pyndem noh ïalade la tip kum u Wanjopmi Talang, 24 snem na West Jaiñtia Hills District.
Haba pynlong ïa ka jingthwet ïa kine ki suba ha kine ar sngi, ki pulit ki la ïoh ksai ïa ka jaka rieh jong ki bad ki la buddien ban ïoh kem noh ïa ki.
Ïa ki ar ngut ki pulit ki la kem na ka jaka rieh jong ki ha Rymbai Road, East Jaiñtia Hills District.
Ka jingjia shah pynïap u Shanbormi Lamare ba dang 25 snem ka rta ka la jia ha ka 7 tarik Kyllalyngkot ha ka shnong Barato. Ki Pulit ki la shimti ïa ka metïap bad pyndep ïa ka jingdonkam katkum ka aiñ ha Jowai Civil Hospital.
