Shillong, K’lyngkot 09
U nongïalam ka All India Congress Committee (AICC), u Dr A. Chellakumar, uba la shah bynshet ban peit ïa ka Meghalaya, u la ong kito kiba pyntroiñ ïa ka Congress bad kiba ibeiñ bad pynïahap bad ka lieng kaba la ngam, kin sa wan ïeng laiñ ba ki kwah ban wanphai biang sha ka seng ynda ka la don ha ka bor synshar.
U Dr A Chellakumar u dei u MP ka Congress na Tamil Nadu bad na ka liang ka AICC ka la bynshet ha u ban peit ïa ka Meghalaya.
Une u nongïalam ka AICC u la wan jngoh ïa ka Jylla ha kaba u la leit sha Garo Hills bad wanphai sha Shillong ha ka Sngi Ba-ar ban ïakynduh ïa ki nongïalam ka Meghalaya Pradesh Congress Committee (MPCC), ki longkmie bad samla ha Congress Bhavan.
Haba kren sha ki lad pathai khubor, u Dr Chellakumar u la ong ba ha ka jingïakynduh bad ki nongïalam ka Congress ha kane ka Jylla, ki pynpaw ka jingkmen bad ka sur na ki paidbah ka Meghalaya ka long ba ki angnud ban wanphai biang ka Congress ha ka bor ha kane ka ilekshon Lok Sabha ban ai ka jingshakri bad ïalam ïa ka Sorkar ban ai jingsynshar kaba shngaiñ ha ka ri baroh kawei.
Kumta u la ong ba ka Congress kan nang ïalap bad pynsngewthuh ïa ki paidbah bad u ngeit skhem ba ki paidbah ha Meghalaya ki ju don borabor bad ka Congress, bad kito kiba la don bad ka Congress kiba la ibeiñ bad iehnoh ki la dep ïoh jingmyntoi lyngba jong ka seng.
Kumta u la ong ba ki paidbah ki kwah ban ïohi biang ïa ka Congress ha ka bor synshar bad ki dak ki la paw shynna wat ha Rajasthan ka Congress ka la ïoh jingjop ha ka ilekshon shiteng samoi wat la ka BJP ka la dep ban jop ha ka ilekshon MLA dang tang shibnai ha kaba u Myntri ka Sorkar BJP u la rem noh.
Haba kylli halor ka jingtlot ka Congress ha Meghalaya ba phet noh ki MLA bad nongïalam sha kiwei pat ki seng saiñ pyrthei, bad la ka Congress kan pdiang biang lada ki wanphai, u Dr Chellakumar u la ong ba ki briew ki wan ki leit hynrei ka Congress ka ïeng bad ka don beit bad ki paidbah.
“Ki paidbah ha ka ri kim mon ïa ka BJP kumno ki lah ban ong ba ka Congress ka dei ka seng kum ka lieng kaba ngam?” u la buh jingkylli.
U la ong ba kito kiba pyntroiñ, ñiew beiñ bad pynïahap ïa ka Congress bad ka lieng kaba ngam shapoh um, kin sa ïeng laiñ ba ki kwah wanphai sha ka Congress ynda ka seng kan don ha ka bor synshar. U la ong ruh ba ka seng ka pdiang ïa kito kiba kwah ban wan sha ka seng.
Kumta une u nongïalam ka AICC u la ong ba ka kamram jong u kum uba peit ïa ka Jylla ka long ban pynkhlaiñ ïa ka seng naduh na trai shaduh shalor.
U la ong ba ka Congress ka la leh bun kiei kiei ban kyntiew ïa ka ri bad ha Meghalaya ruh bun ki kam bad ki matti kiba la leh ha ka por jong ka Congress naduh ka jingdon ka NEHU, IIM, NIT bad kiwei kiwei.
U la ong ba u MP ka Shillong u Bah Vincent H Pala ruh u la leh shibun ki kam naduh ka jingpynlong ïa ki surok bah kum ka surok Shillong-Tura lyngba ka Nongstoiñ bad kiwei kiwei ki kam ban kyntiew ïa ka Jylla.
Kumta u la ong ba ka Congress ka don ka jingkyrmen skhem ba kan jop baroh na ar tylli ki konstitwensi kata na Shillong bad Tura ha ka ilekshon ban wan.
