Shillong, K’Lyngkot 09
U nongïalam ka seng Bharatiya Janata Party (BJP) Meghalaya u Bah A.L Hek, uba long ruh u Myntri ka Sorkar Jylla u la ong ka long kaba thikna ban wan ka Sorkar BJP ha Meghalaya ha u snem 2028, lada kum ka seng ka la pynkhreh naduh mynta.
“Lada ngi la pynkhlaiñ bad pynkhreh naduh mynta ngin ïoh beit ïa ka Sorkar BJP hapoh Meghalaya ha u snem 2028,” la ong u Bah Hek haba pdiang sngewbha ïa lai ngut ki rangbah kiba la pynïasoh ïalade sha ka BJP ha ka Sngi Ba-ar.
Ïa kine lai ngut ki rangbah kiba kynthup ïa u Dr. Wansainbor A Lyngwi na Sohra, u Bah Meialam Kharmalki na Upper Shillong bad u Bah Elnathan Ryntathiang na Umlyngka, la pdiang ha ka jingïalang kaba la pynlong ha shlem treikam jong ka BJP Meghalaya.
Ïa kine lai ngut la pdiang da u nongïalam ka BJP ha Meghalaya bad Myntri Sorkar Bah A.L Hek ryngkat ka jingïadon lang u nongaiktien ka seng Bah M Kharkrang lem bad kiwei kiwei ki nongïalam bad nongkitkam ka seng.
Shuh shuh na ka liang jong u Bah A.L Hek u la ong ba kane ka jingwan ïasoh ki rangbah kan nang pynkhlaiñ shuh shuh ïa ka BJP khamtam ha ka ban pynkhreh ïa ka ilekshon MP ka ban long mynta u snem bad kumjuh ruh ïa ka ilekshon MLA ha u snem 2028.
U Bah Hek u la ong ba kino kino kiba ïasoh sha ka BJP ki dei ban buh ïa ka mat jong ka bha ka miat ka Ri hakhmat eh bad ki dei ban trei shitom ban kyntiew ïa ka seng bad ïa ka imlang sahlang.
