Nongpoh, K’Lyngkot 09
Ka Meghalaya Aids Control Society (MACS) ha ryngkat ka jingïatreilang bad ka shlem treikam u Deputy Commissioner lem bad ka shlem jong ka tnat ka koit ka khiah ka Ri Bhoi District ha ka sngi Ba-ar ka la ïoh ban pynkut noh ïa ka prokram ai jingsumar ei sha ki paidbah ha kylleng ki shnong ka thaiñ Ri Bhoi lyngba ka Integrated Health Campaign. Ïa kane ka prokram ai jingsumar ei la sdang ha ka district naduh ka 17 tarik jong u Risaw 2023.
U MLA ka Nongpoh, uba dei ruh u Chairman ka Meghalaya State Health Advisory Board, u Bah Mayralborn Syiem u la wan ban shim ïa ka bynta kum u kongsan ha ka jingïadon ryngkat jong ka Dr. B Decruse, Project Director ka MACS, Dr. L Myrthong, Deputy Director (Medical) MACS, ka Dr. D Blah Additional District Medical & Health Officer ka Ri Bhoi District, ka Dr. E Kalwing, District AIDS Control Officer (DACO) ka Ri Bhoi District bad kiwei kiwei ki ophisar na ki tnat sorkar bapher bapher.
Ka Dr E Hujon haba ai jingkren lamphang ha kane ka sngi halor kane ka prokram ai jingsumar ei sha ki paidbah ka la pyntip ba la pynlong ïa kane ka prokram ha ryngkat ka jingïasnohkti lang jong kiwei kiwei ki tnat treikam sorkar kum shi bynta ban pynsngewthuh paidbah halor ka koit ka khiah khamtam ha kaba ïadei bad ka jingpang HIV, AIDS, TB bad kiwei kiwei.
Ka Dr Hujon ka la pyntip ruh ba ki don haduh 181 tylli ki jaka (camp) kiba la pynlong ïa kane ka jingai jingsumar ei ba kynthup ïa 51 tylli ki static camp bad 130 tylli ki extended outreach ha kaba la ïoh ban khmih bniah ïa kumba 12,282 ngut ki briew ha baroh kawei ka district na ka bynta ki jingpang bapher bapher. Lyngba kane ka prokram la ïoh ruh ban khmih bniah na ka bynta ka jingpang HIV ïa kumba 6871 ngut ki briew, ha kaba la lap ba 23 ngut ki dei kiba la ngat ha ka jingpang HIV.
Katba u Bah Mayralborn Syiem haba ai jingkren, u la ai ka jingkhublei kyrpang ïa ka MACS kaba la jied ïa ka Ri Bhoi District ban pynlong ïa kane ka prokram ai jingsumar ei, kaba la long shisha ka jingmyntoi kaba khraw ïa ki paidbah nongshong shnong jong ka thaiñ Ri Bhoi kaba dei ruh ka Aspirational District bad pynpaw ruh ba kum ka District ka la nang kiew shaphrang ha baroh ki liang khamtam ha kaba ïadei bad ka liang jong ka koit ka khiah da ka jingshimkhia jong ka sorkar jylla bad ruh ka sorkar kmie.
U Bah Mayralborn u la ong ruh ba ka Ri Bhoi District ka dei kaba duna kiba ïoh ïa ka jingpang HIV, AIDS haba ïanujor bad kiwei ki District ha ka jylla, hynrei kumba la dei ka jingkhang ban rung sha ka jylla bad ruh kaba don marjan bad ka jylla Assam bad kiwei ki jylla ka thaiñ Shatei Lam-Mihngi, ka don hapdeng ka jingma kaba khraw bad kumta ka long shisha kaba donkam ban pynsngewthuh sha ki paidbah halor kane ka jait jingpang bad ruh ban pynlong ïa kum kane ka jait prokram khnang ba ki paidbah kin sngewthuh shai.
U la pyntip ruh ba ka sorkar ka la shim ïa bun ki sienjam ban ïakhun bad rat dyngkhong halor ka jingkynrei jong u drok, ka jingdih duma bad kiwei kiwei ki jingdih basniew bad ong ruh ba donkam ïa ka jingïatreilang jong baroh ki paidbah ha ka imlang ka sahlang ha ryngkat ki bor sorkar ban pynduh jait ïa kine ki jingpang bad ki jingdih basniew kiba lynshop ha ka imlang ka sahlang.
