Shillong, K’Lyngkot 09
Ka Voice of the People Party (VPP) ka la ong ba ka jingtynjuh ïa ka Bharatiya Janata Party (BJP) ha kane ka ilekshon ban wan sha ka Lok Sabha kan dei na ki seng ‘riewlum.
“Ha kane ka kynti, ka jingtynjuh ïa ka BJP hapoh ka ri kan dei na ki seng ‘riewlum bad ïa kane lah ban sakhi ha ki Jylla bapher-bapher. Ka Congress kam long shuh ka jingtynjuh ïa ka BJP,” ong u nongaiktien ka VPP, Dr. Batskhem Myrboh.
U la ong ruh ba ka jingdon jong ki seng ‘riewlum ka long kaba donkam ha India ban ïada ïa ka jinglong kyrpang jong ka ri ha ki bynta bapher-bapher kumjuh ïa ka jinglong-jingman ha ka rukom phiah ïa ka synshar-khadar hapdeng ka Sorkar Pdeng bad ki Sorkar Jylla.
“Ka VPP ka dei ka seng kaba ïeng ha ka nongrim jong ki ‘riewlum,” u la ong.
U Dr. Myrboh haba ban jur halor ka jingdonkam jong ki seng ‘riewlum, u la ong ba ha ki por ba la leit noh, ka Congress haba ka synshar hapoh ka Jylla ka dang hap hi ban shaniah ha ki seng ‘riewlum namar kam lah ban ïaid marwei.
Halor ka jingkynthoh ba dang shen na u khlieh nongïalam ka Congress hapoh ka Jylla, Bah Vincent H. Pala ba ka VPP ka la sdang ban hiar, u nongaitktien ka seng u la ong, “Kum u nongïakhun pyrshah, u sngewthuh bha ïa ka jinglong-jingman shane-shatai ba ka jingshisha ka long ba ka VPP ka dei ka seng kaba khlaiñ bor bad ka ban ai ka jingïakhun kaba jwat ïa u ha kane ka ilekshon ban wan.”
U la ong ruh ba u Bah Pala namarba u don ka jingsheptieng ïa ka jingnang kiew jong ka seng katba nang mih ki sngi, kumta ban pyntlot ïa ka nongrim bad ka jingkyrshan kaba ka seng ka ïoh na ki paidbah, um banse ban kren ha katei ka rukom.
“Ka jingkren jong u ka pyni ba um shaniah shuh ïa ka lawei lajong ha ka saiñ pyrthei namar wat ha Jylla ruh um don jaka shuh,” ong u Dr. Myrboh.
Haba pynkynmaw ïa ka ilekshon MP kaba la dep, u la ong ba u Bah Pala u la jop namar ka ‘vote’ kaba long pyrshah – kaba mut ki paidbah ki isih ïa ka BJP ha ka Sorkar Pdeng bad kumta kim banse ban phai khmat sha ka Congress hynrei ym ba ki ai ïa ka ‘vote’ sha u Bah Pala.
“Kane ka dei ‘vote’ namar ka jingpyrshah ïa ka BJP. Ka Congress ha ka kyrdan jong ka Sorkar Pdeng ruh kam leh bha bad kumta ym don lawei ïa ka,” u la ong.
Haba pynpaw ka jingkyrmen skhem ba ka seng ka long kaba la khreh ban wanrah ïa ka jingkylla, u nongaiktien ka VPP u la ong, “Kiwei-kiwei ki seng heh ka Jylla kim shym la pynleit jingmut bad pyrkhat ba ka VPP ka dei ka seng tit hynrei ka VPP ka dei ka seng kaba nang kiew wat hadien ka ilekshon.”
Shuh shuh u la bynrap ba haba phai sha ka jingpynrung dkhot jong ka seng kaba dang ïaid mynta ha kylleng ka Jylla, ki seng saiñ pyrthei ki la sakhi bha ïa kane ka jingkiew jong ka VPP.
