Shillong, K’lyngkot:
Ka Mawpait Tlongpleng Sports & Cultural Club, Ranikor Block, South West Khasi Hills District ha ka 8 tarik u Kyllalyngkot 2024 ka la pynlong ïa ka jinglehkmen pdiang snem thymmai bad ki hep barit hapoh ka shnong da ki jingïalehkai bapher bapher kum ka run for fun, penalty shoot-out, hit the tin, sack race, carrom board, sweet meat game, in & out game bad ka tug of war.
Ïa kitei jingïalehkai la phiah da ki House kum ka Sngap Sing Syiem House, Tirot Sing Syiem House, Wickliffe Syiem House bad ka Kiang Nangbah House.
Baroh khoit kitei ki jinglehkai ki la pynkmen bad pynshongshit ïa ki hep barit.
La sdang ïa ka jinglehkai da ka ‘Run for Fun’ ha ka por mynstep da ka jingduwai ba la ïalam da u President ka MTS&CC Kromlin Shylla.
La pynhap pyrda ïa kane ka jinglehkai Winter Games da u Myntri Bah Donboklang Kharlyngdoh uba la pyrto ïa ka MTS&CC kaba la ju pynlong ïa kane ka jinglehkai man la u snem.
U Bah Donbok u la sneng la kraw ïa ki hep barit ba kin long kiba smat kiba sting ha ka pule puthi, kiba kohnguh ïa la ki kmie ki kpa bad kiba tip i’u Blei Nongbuh Nongthaw kumjuh ruh u la hikai ba kin long ruh kiba lehkhuid ïa la ka shnong ka thaw.
Ha kane ka sngi u Myntri u la ïoh ban ai ka jingai sngewbha sha ki longkmie jong ka shnong da ki tapmoh khlieh, kumjuh ruh sha ki hep barit kiba pass bha ha ka eksamin jong u snem 2023.
Ïa ka khusnam bad song pisa kaba rit la aiti sha u kapten ka Kiang Nangbah u Mangkara Snaitang da u Myntri, bad ïa ka kynhun kaba ar ka Sngap Sing Syiem la aiti da ka song pisa kaba rit eh sha ka kapten ka Mawlynnai Snaitang.
