Shillong, K’lyngkot 10
Ka “The Kitbok Cancer Care” Foundation ha ryngkat ka jingïatreilang bad ka Mawngap Multipurpose Cooperative Society Limited kan sa pynlong ïa ka ‘Cancer Care Concert’ halor ka phang ‘Scaling Heights Park’ ha ka 27 tarik mynta u bnai ha madan jong ka skul St. Paul’s High School, Mini Stadium, Marbisu kum ka lad ban pynmih pisa na ka bynta ka jingthmu babha ban ïarap ïa ki briew kiba donkam shisha ïa ka jingïarap ban sumar ïa ka jingpang bampong.
Haba kren sha ki lad pathai khubor ha Shillong Press Club, ka nongaiktien jong ka ”The Kitbok Cancer Care” Foundation, ka Kong Banylla Dkhar ka la kdew ïa ka lamphang jong katei ka tem ka put ban ai jingïarap da ka pisa kaba mih na katei ka tem ka put sha kito kiba don ïa ka jingpang bampong bad ïa ka ïing ka sem jong ki.
Ka Kong Dkhar ka la ong ba katei ka prokram ka dei ka prokram kaba nyngkong eh jong ka Foundation ba ki la pynlong ha ryngkat ka jingïatreilang bad ka TWE kaba hap hapoh ka Mawngap Society. Ka la ong ruh ba nangne shakhmat kin dang ïaid ban peit bad wad ïa ki jingkheiñ ha kaba ïadei bad ki briew kiba pang bampong.
“Katkum ka jingtip jong ngi hapoh ka jylla jong ngi, kiba mad ïa kane ka jingpang bampong ki la don jan manla ki thliew ïing mynta, na ka liang jong ngi ka Foundation nangne shakhmat ngin sdang ban ïaid suki-suki khamtam ïa ki longïing kiba donkam shisha ïa ki jingïarap ka jong ngi ka Foundation”, la ong ka Kong Dkhar.
Shuh shuh ka Kong Dkhar ka la ong ba ka jingthmu jong ka Foundation ka long ba ki kwah ba ki nongpang ki dei ban mih na ka jingpang bad kim dei ban shong ha ka jingpang.
Na ka liang u nongaiktien ka Mawngap Multipurpose Cooperative Society Limited, u la pynpaw ka jingsngewkmen ban ïoh ïa ka lad ban ïatreilang bad katei ka Foundation kaba don ïa ka jingthmu kaba bha bad kaba ai jingïarap ïa ki longïing kiba kyrduh bad kiba mad ïa ka jingjynjar na ka daw ka jingpang bampong.
Ha katei ka tem ka put kin sa don katto katne ngut ki nongrwai bapaw jong ka jylla ki ban wan ïashimbynta kiba kynthup ïa ka Jessie Lyngdoh, ka Gracyl Ropmay, Ram Suchiang, ka kynhun Khmih, Dbryan, Genieve Nongrum bad kiwei kiwei.
Shuh shuh ha katei ka sngi ka kongsan kan long ka Dr. Mazel Ampareen Lyngdoh kaba dei ka Myntri ka tnad ka koit ka khiah bad kaba dei ruh ka MLA jong ka Laitumkhrah konstitwensi kaba la kloi ban kyrshan lem ïa ka Foundation ha kaba ïadei bad katei ka kam bad u Symbud kongsan un dei u Bah Fantin Lakadong.
Ka bai rung na ka bynta katei ka tem ka put kan long T. 300 marwei na ka bynta kiba heh bad T. 150 na ka bynta ki khynnah.
Ka “The Kitbok Cancer Care” ka dei ka kynhun kaba dang shu mih shen, kata ha ka 22 tarik u Risaw 2023, kaba don ha Nongrimbah, Laitumkhrah, Shillong. La seng ïa ka da katto katne ki dkhot kiba don ïa kajuh ka jingthmu bad ka thong kaba bha ban kner ïa ki kti jingïarap sha ki longïing kiba duk bad kiba mad jingjynjar na ka daw jong ka jingpang bampong (cancer), ym tang da ka bor pisa hynrei ha kiba bun ki liang bad ki rukom bad ym tang ïa ki nongpang hynrei wat ïa ki bahaïing hasem ruh kumjuh.
Ïa kaba mynta katei ka “The Kitbor Cancer Care” ka don 5 ngut ki dkhot kiba hakhmat bad 11 ngut ki dkhot synrop. Kane ka jingmut ba bha ka la mih na ka jingpyrsad mynsiem da uwei u samla rangbah uba dang shu dep khlad noh ha ka 20 tarik u Nailar ha ka snem 2021 na ka daw jong ka jingpang bampong kaba lah ktah ïa u. Utei u rangbah u dei ïa ba la tip kyrteng kum u Bah Kit bad la ju khot ïeid ïa u kum u RJ Kit lane Kitty Kit, uba dei ruh u Radio Jockey bapawnam jong ka FM Station Red FM 93.5 kaba la seng ha u snem 2008.
Kum ka kynhun “The Kitbok Cancer Care” lem bad ka Mawngap Multipurpose Cooperative Society Limited, ka khot ka wer sngewbha ïa ki nongshong shnong jong ka jylla ba kin ïa wan ban kyrshan lem ïa kitei ki kynhun na ka bynta kane ka jingthmu babha.
“Ka jingdon ryngkat jong phi ha kane ka sngi kan long ka jingkyrkhu ïa kito ki longïing longsem kiba mad ïa ki jingeh na kane ka jingpang bashyrkhei”, la pynkut katei ka kynhun.
