Nongpoh, K’Lyngkot 10
Ha kawei ka jingjia ha ka Sngi Ba-ar, uwei u nongtrei jong ka tnat MePTCL u la pynkut noh ïa la ka jong ka jingim ha u tyllai phasi hapoh ka ‘quarter’ kaba u sah ha Bara Killing, Ri Bhoi District.
Katkum ka tyllong khubor na ki pulit, la ïathuh ba ïa ka met jong utei u rangbah ba la tip kyrteng kum u Paimon Khongkrom la lap nyngkong da ki para ba ïatreilang kaba la sdien ldui hapdeng ka jingkhang ha ka por kumba 8:30 eiei mynstep. La ïathuh ruh ba utei u rangbah u la sdien phasi ïalade da kaba pyndonkam da ka pla ïew Khasi.
Na ka liang ki bor pulit hadien ba ïoh tip ïa katei ka jingjia, ki la leit ban pynlong ka jingtohkit bad ïa ka met kaba sah jong utei u rangbah ruh la law noh da ki bahaïing hasem na utei u tyllai phasi ha ka jingdon ryngkat jong ki bor pulit.
Shuh shuh, na ka liang ka lok jong utei u rangbah, ka Kong Keldaris Mawlong lem bad ki bahaïing ki la ïathuh ba utei u rangbah u dei uba don jingduna ha ka bor pyrkhat. Kumta kim shym la don ka jingsuba sniew da kumwei pat halor katei ka jingphasi bad kyrpad ïa ki bor jong ka aiñ ban pyllait ïa ka post mortem. Na ka liang ki bor District ruh ki la mynjur ïa katei ka jingkyrpad jong ka ïing bad la aiti noh ïa ka met kaba sah sha ka lok bad ki bahaïing hasem na ka bynta ba kin pyndep ïa ka jinglehniam ba khatduh.
