Shillong, K’lyngkot 10
Ka Delimitation Committee ba la khlieh da u Dr. S. Kharsyiemlieh ka dang ap ïa ka electoral roll na ka tnad Ilekshon ka Sorkar Jylla khnang ban suk haba pynbeit thymmai biang ïa ka jingdon briew ha ki konstitwensi jong ka KHADC.
Haba ïakren bad u Chairman ka Delimitation Committee Dr. S. Kharsyiemlieh, u la ïathuh ba mar shu dep mynjur u Lat ka jylla ïa kane ka committee mar-mar ki la thoh shithi sha ka tnad Ilekshon ka Sorkar Jylla ban pan ïa ka electoral roll khnang ban pynbeit ryntih ïa ka jingdon briew.
U la ïathuh ba haduh mynta ka tnad Ilekshon kam pat phah ïa ka electoral roll sha ka KHADC, dei na kane ka daw ka kham slem ban pynbeit thymmai ïa ka jingdon ki nongthep vote ha ki konstitwensi.
Shuh shuh u la ïathuh ba ki la pan ruh ïa ka jingdon ki jaka thep vote (polling station) ha man ki konstitwensi khnang ban sngewthuh ïa ka jingdon ki nongthep vote haba rah ïa ki jaka thep vote na kawei ka konstitwensi sha kawei pat.
U Dr. Kharsyiemlieh u la ïathuh biang ba lada ym pat ïoh ïa ka electoral roll ka kham shem jingshitom ban pynbeit thymmai ïa ki konstitwensi namar ïa ka ilekshon MDC la pynïaid da ka sorkar jylla, bad kumta ki kwah ba ka sorkar jylla kan ai ïa ka electoral roll.
Ha kajuh ka por u la pyntip ba ynda ki la ïoh ïa ka electoral roll ka la suk ban pynïaryngkat ïa ka jingdon ki nongthep vote ha ki konstitwensi.
U la ïathuh ruh ba ynda ki la dep pynbeit ryntih ïa ka jingdon briew kin hap ban hiar sha kito ki konstitwensi kiba la pynbeit thymmai ban sngap ïa ka sur jong ki paidbah.
Da ka jingslem ban ai ka sorkar jylla ïa ka electoral roll sha ka KHADC, la sngewthuh ba ka ilekshon ban jied pynthymmai ïa ki MDC ha KHADC bad JHADC kan dang slem.
Kum ban shu pynkynmaw, ka jingkwah ban pynbeit thymmai ïa ki konstitwensi ka dei namar ki don ki konstitwensi kiba la bun briew shaba palat bad don kiba duna briew palat. Dei na kane ka daw ki kwah ban ïaryngkat ki nongthep vote khnang ban poi ryntih ki skhim sha ki shnong ki thaw.
