Shillong, K’lyngkot 10
Ka Joint Action Committee (JAC) jong saw tylli ki seng kiba don ha thaiñ Sawsymper, Mawsynram Block, East Khasi Hills District kiba kynthup ïa ka KSU, FKJGP, HUAN bad HYC ki la dawa na u Deputy CEM ka KHADC Bah Pynshngaiñ N Syiem ban pynhiar khet noh ïa u Syiem ka Hima Maharam u Pa’iem Naindro Syiemïong namar u la synshar donbor palat.
Kane ka jingdawa ka JAC ka dei hadien ba ka KHADC hapoh ka jingïalam u Bah PN Syiem kum u Deputy CEM bad uba bat ïa ka tnad Elaka u la khot mynta ka sngi ka 10 tarik u Kyllalyngkot ban sngap ïa ki nongujor ïa u Syiem.
Haba kren bad ki lad pathai khubor na ka liang u Secretary jong ka JAC u Bah Drimshon Mawleiñ u la ong ba ka jingujor jong ki ka dei ban pynhiar khet noh mardor ïa u Syiem jong ka Hima halor ka jingsynshar donbor jong u. U la kynnoh ba u Syiem ka Hima u long ruh uta u nongpynthut ïa ka shong suk shong saiñ hapoh ka hima kaba la wanrah ruh jingkulmar hapoh ka Raid Sawsymper.
U la ïathuh ba ka jingujor pyrshah ïa u Syiem Hima Maharam ka dei namar u la pynmih hukum ban lum khajna ïa ka jingmih ki shyiap ha Sawsymper hynrei haba ka KHADC ka la pynsangeh u khlem sngap namar u lum khajna biang.
U la maham ruh ïa ki nongkitkam ha ka saiñpyrthei ba kim dei ban wan mushlia ïa ka kam ha Sawsymper namar ma ki, kin trei beit ïa ka kam ha la ki konstitwensi katba ma ki pat kin trei hapoh ka Raid Sawsymper.
Shuh shuh u la pyntip ba u Syiem Maharam u la pynduh lut ïa ka sanad jong ki rangbah shnong ha Raid Sawsymper kaba la pynkulmar lut ïa ki paidbah.
“Ngi sngewkmen ba ka Executive Committee ka KHADC ka la sngap ïa ka jingujor jong ngi bad ngi kwah ba kan weng noh mardor ïa u Syiem Maharam” u la ong.
