Khliehriat, K’Lyngkot 10
Ka Dorbar Shnong Tuber Kmaishnong da ka jingsngewkhia halor ka jingshah pynmynsaw ki nongïalam shnong kiba kynthup ïa u Waheh Shnong u Bah Micky Lyngdoh bad u Bah Denis Lyngdoh, Secretary IVCS uba long ruh u Chairman ka shnong Tuber, ha ka 10 tarik Kyllalyngkot ki la pynlong ka jingïaid paidbah kaba jai-jai ryngkat ka jingrah lama ïong ban pynrem ïa u Training Phawa uba donkti ban thombor ïa kitei ki nongïalam shnong haduh ban mynsaw jur.
Ha kane ka jingïaid paidbah la shim bynta da ki spah ngut ki nongshong shnong kiba kynthup naduh ki nongïalam shnong, ki longkmie longkpa bad samla shynrang bad kynthei kiba la rah lang ïa ki lama ïong ryngkat ki placard jingthoh pynrem ïa u Training Phawa uba dei na kajuh hi ka Shnong Tuber Kmaishnong.
Katkum ki placard la thoh, “Ka Dorbar Shnong Tuber Kmai Shnong ka pynrem jur ïa ka jingleh riewkhlaw jong u Training Phawa uba kam ïalade kum u dkhot ka Jaiñtia National Council, Finance Secretary Sengkmie, uba thmu ban pynïap ïa arngut ki mynsiem briew”.
Shwa ka jingïaid paidbah, la pynlong ïa ka jingïalang lyngkot ha madan Yurim Khliehpynthor ha kaba u Waheh Shnong u Bah Micky Lyngdoh u la ïathuh ïa kaei kaba la jia ïa ki ha ka miet 3 tarik.
Nalorkata, la ïoh ruh ka jingkren lyngkot na u General Secretary Shnong Bah Tellmetrue Phawa, Secretary VDP Molting Phawa bad na u Waheh Shnong barim u Bah MB Sana.
Baroh ki nongkren ki la pynrem ïa ka jingleh jong u Training Phawa bad ha kajuh ka por ki kyntu ruh ïa baroh ki nongshong shnong ban burom ïa ki nongïalam shnong bad wanrah ruh ïa ka jingïatylli kawei hapoh ka shnong ka thaw. La kyntu ruh ïa ki kmie ki kpa ban ai jinghikai ïa ki khun ki kti khnang ba kin nang ban burom ïa kiba la san la rangbah bad ban bha ka imlang sahlang.
Hadien ka jingïalang lyngkot, ki nongshong shnong ki la mih na madan Yurim Khiehpynthor ban ïaid paidbah ha kylleng ka shnong ryngkat ka jingpyrta pynrem bad jam ruh ïa ka surokbah bad ïaid shaduh ka dong Siehkynda.
Kum ban shu pynkynmaw, ka jingjia shah pynmynsaw ki nongïalam shnong ka la jia ha ka 3 tarik Kyllalyngkot ha ka por 11:30 mynmiet ha ka por ba u Bah Micky bad u Bah Denis ki dang thmu ban pynjai-jai ïa ka jingkulmar hapoh shnong Tuber Kmai Shnong, ka jaka kaba la tip kum ka Kamar Khlot, hynrei kyndit kynsan ki la shah thombor ha u Training Phawa uba la mait da u sdie ïa kitei arngut haduh ban mynsaw jur.
