Shillong, K’Lyngkot:
Kum shi bynta jong ka ‘Media Tour’ hapoh ka Viksit Bharat Sankalp Yatra, ka kynhun jong ki nongthoh khubor na Uttar Pradesh ka la wan jngoh ïa ka Jylla Meghalaya.
Ha ka Lah Sngi U Blei, ka kynhun ka la leit jngoh ïa artylli ki jaka ha kaba la pynlong ïa ka prokram jong ka Viksit Bharat ha East Khasi Hills District ba kynthup ïa ka shnong Mawmihthied bad ka Swer.
Ki nongthoh khubor ki la ïoh lad ruh ban ïakren bad ki ophisar jong ka Sorkar Jylla, ki Rangbah Shnong bad ki briew kiba ïoh myntoi ïa ki skhim Sorkar ba ïadei bad ka bha ka miat.
Ki jingthmu ba kongsan jong kane ka ‘Media Tour’ ka long ban plie lad ïa ki nongthoh khubor ban ïohi dalade ïa ka jingïaid shaphrang ki skhim Sorkar Pdeng bapher-bapher ba pyntreikam ha Meghalaya bad ban plie lad ïa ka jingthoh khubor shaphang ki kam bapher-bapher ba la pyntreikam da ki tnad Sorkar Pdeng bad ban ïohi kumno ki kali Viksit Bharat SankalpYatra IEC Van ki ai jingtip shaphang ka jingpyntreikam ïa ki skhim bapher-bapher ha Jylla Meghalaya.
Ha kajuh ka por, ka plie lad ruh ïa ki nongthoh khubor jong ka Uttar Pradesh ban sngewthuh ïa ki jinglong-jingman ha kaba ïadei bad ka jingseisoh ki skhim jong ka Sorkar Pdeng ha Meghalaya.
Ka Bureau ka la pynlong ïa ki ‘Press Tour’ ha ki Jylla bapher-bapher ban ïarap ïa ki nongthoh khubor ba kin ïohi dalade ïa ki kam pynroi kiba dang pyntreikam ha ka ri bad ïarap ïa ki ban ai jingtip shaphang ki kpait saiñ kam (Policy) ba kongsan jong ka Sorkar.
Ïa ka ‘Press Tour’ la pynlong da ka Press Information Bureau, Shillong ha ka jingïatreilang bad ka Press Information Bureau, Lucknow hapoh ka jingkyrshan ka tnad Information & Broadcasting, ka Sorkar India.
Ka kynhun jong ki nongthoh khubor ka la leit jngoh ruh ïa ki dukan jong ki skhim Sorkar ba la buh ban ai jingtip shaphang ki skhim jong ka Sorkar khnang ban pynpoi pura ïa ki skhim bad ai jingmyntoi ïa ki briew kiba haduh mynta kim pat ïoh ïa ki jingmyntoi jong kine ki skhim.
Ka kynhun ka la ïaroh ïa ki sienjam jong ka Sorkar Jylla ban pynlong ïa ka Viksit Bharat Sankalp Yatra kaba jop wat ha ki jaka nongkyndong.
Ha ka jingsah jong ki ha Meghalaya haduh ka 11 tarik Kyllalyngkot, 2023 kin leit jngoh ruh ïa ka West Jaiñtia Hills bad Ri-Bhoi distrik ban sngewthuh ïa ki jinglong-jingman ha kaba ïadei bad ka jingseisoh ki skhim jong ka Sorkar Pdeng ha Meghalaya.
