Shillong, K’Lyngkot 10
U Rakkam A Sangma uba dei u nongïalam ka seng National People’s Party (NPP) bad ruh u Myntri ka Sorkar Jylla u la ong ba ka seng Congress mynta ka la kylla long tang kum ka khana pateng (history) katba ka NPP pat kan dei ka lawei (future) na ka bynta ki samla.
“Ka seng Congress mynta ka la dei tang ka khana pateng bad ki paidbah ki kwah ïa ka lawei bad ka mynta bad kim kwah ban vote ïa ka khana pateng. Ka NPP ka la dei mynta kata ka lawei jong ki paidbah,” la ong u Rakkam haba kren sha ki lad pathai khubor ha ka sngi Balang.
U Rakkam u la pynpaw ïa kane hadien shisngi ba u MP ka Congress u Bah Vincent H Pala u la ong ba ka Congress ha ka por ba ka don ha ka Sorkar Kmie ka la theh shibun ki kam pynroi hapoh ka jylla bad kaba la lah ruh ban wanrah ïa ki jingtei kum ka NEHU, IIM Shillong, NIFT Shillong bad kiwei kiwei ki projek kiba la long ka jingmyntoi hapoh ka jylla.
“Kaei kaba la leh bad wanrah da ka Congress ka dei kaba la dep mynshwa, mynta ka la don tang ha ka khana pateng bad yn buh ïa katei tang ha ki kot,” u la ong bad bynrap ki paidbah kim ju vote ïa ka khana pateng, ki kwah ïa ka lawei bad ïa ka mynta,” la ong u Rakkam.
U la ong ha ka por jong ka Congress ka Ri ka la ïoh ïa ka jinglaitluid, te shaei ka Congress mynta, kumjuh ruh ka Meghalaya ka la ïoh jylla lajong ha ka por ka seng APHLC, te shano ka APHLC mynta. “Mynta, kam shong eh ha ka seng saiñ pyrthei ne ki kam, mynta ka shong ha u briew shimet, bym don ha ka khana pateng bad ki kot, kiei kiba la kren ki dei ki histori, ka histori ka long ban pule ym ban pyntreikam, ki samla ki donkam ka lawei ym ka khana pateng,” la ong shuh u Rakkam.
“Ha kine ki 5 snem ba la leit, nga la pynshna ka surok kaba biang bad paka bha ha kawei na ki shnong hapoh ka konstitwensi ka jong nga, hynrei ha ka ilekshon kaba la dep, ngam shym la ïoh vote satia na kato ka shnong,” la ong u Rakkam.
U la ong, ba ki paidbah khamtam ki samla ki dei ban jied ïa ka seng kaba kumno kin jied, ka seng aïu kaba lah ban trei bha bad ka seng kaba kumno kaba lah ban thaw ïa ki lad aikam aijam bad ka seng NPP kan dei ka lawei ka jong ki.
