New Delhi, K’Lyngkot 10 (UNI)
Ki nongïalam ka Congress ba kynthup ïa ka Sonia Gandhi, Mallikarjun Kharge bad u Adhir Ranjan Chowdhury kin ym leit ban ïashim bynta ha ka jingplie ïa ka Ram Temple ha Ayodhya ha ka 22 tarik Kyllalyngkot, bad ka seng ka la ong ba kane ka jingplie ka dei ba la pynïaid da ka “RSS/ BJP”.
Ha u kyrwoh khubor, u General Secretary ka seng, u Jairam Ramesh, u la ong ka jingplie ïa ka Ram Temple ka bym pat dep lut ka jingshna da ki nongïalam ka seng BJP bad RSS ka long tang na ka bynta ban ïoh jingmyntoi saiñpyrthei ha ka ilekshon.
U la ong, “Ïa u Lord Ram la mane da ki million ngut ki paidbah ha ka Ri. Ka jingngeit ka dei ka kam shimet. Hynrei ka RSS/BJP ki la pynlong saiñpyrthei ïa kane ka projek shna Temple ha Ayodhya.”
Lah ban kdew ba ka Shri Ram Janmabhoomi Teerth Kshetra Trust ha u bnai ba la lah, ka la phah ïa ki jingkhot sngewbha sha u President ka Congress bad nongïalam ka Liang Pyrshah ha Rajya Sabha, u Mallikarjun Kharge, Chairperson ka Congress Parliamentary Party, ka Sonia Gandhi, bad u nongïalam ka seng ha Lok Sabha, u Adhir Ranjan Chowdhury, ban wan ïashim bynta ha katei ka jingplie ïa ka Ram Temple.
U Jairam u la ong, “Wat lada ngi bat ïa ka hukum ka Supreme Court ha u snem 2019 bad burom ïa ka jingsngew jong ki million ngut kiba mane ïa u Lord Ram, u Mallikarjun Kharge, ka Sonia Gandhi bad u Adhir Ranjan Chowdhury, da kaba burom, ki la kyntait ïa ka jingshah khot sngewbha namar ka paw shai ba ka dei ka jingïalang jong ka RSS/BJP.”
