Shillong, K’Lyngkot 10
Ki pulit ka Assam ki la ïoh ban kurup ïa u drok uba shongdor haduh T. 100 klur na Karimganj distrik ha ka Sngi Ba-Ar, bad la kem ïa saw ngut kiba donkti.
Haduh mynta, la ong ba kane ka dei ka jingïoh kurup drok kaba heh tam ha ka thaiñ Shatei Lam Mihngi.
Katkum ki khubor ba la ïoh lum, la ong ba ka kynhun pulit jong ka Special Task Force (STF) bad ki pulit ka Karimganj ki la pynlong ïa ka jingpeitngor ha Suprakandi, bad ha ka por 2:15 mynsngi, ki la ïoh ban bat ïa kawei ka kali.
Ha ka jingkhynra ïa katei ka kali, la lap ïa u drok Heroin uba don ha ka jingkhia 5.1 kilo, 64,000 tylli ki dawai kuli Yaba, bad saw synduk u sikret ba nabar ri.
Ki saw ngut kiba la shah kem ha katei ka jingkhynra la tip kum u Nur Ahmed, u Ramngheaka, u Lalchamliana, bad ka Zosangliani.
U Nur u dei uba la ñiah ïa katei ka kali, bad u dei u nongshong shnong ka Patharkandi, Karimganj, bad kitei ki lai ngut kiwei pat kiba na jylla Mizoram.
Ha ka jingtohkit halor katei ka jingjia da ki pulit la lap ba ki drok ki dei kiba la wan be-aiñ na shabar ri, lyngba ka jylla Mizoram bad la thmu ban kit sha kiwei pat ki jylla jong ka ri.
U DIG ka STF, u Partha Sarathi, haba kren bad ki lad pathai khubor, u la ong ba kane ka jingïoh kurup drok ka dei kaba heh tam duh haduh mynta haba ïanujor bad kiwei pat ki jingïoh kurup drok ha ka thaiñ Shatei Lam Mihngi.
