Jowai, K’Lyngkot 10
U Bah Training Phawa uba dei na ka shnong Tuber Kmaishnong ha ka kyrwoh ba u la phah, u la kyntait ïa ka jingkynnoh ba u shoh pynmynsaw ïa ar ngut ki nongïalam shnong ka Tuber Kmaishnong kaba la jia ha ka miet 3 tarik Kyllalyngkot.
U la pynshai ba ha ka jingshisha, u la ong ba la don arngut ki samla kiba dei ki bahaïing jong u, kiba wan kai bad ïaid lynti lyngba ka ïing u Waheh Shnong, bad katba ki dang ïaid, la don katto katne ngut ki briew kiba ïeng ha jaka kyndong ba dum kiba ïakren sih bad tim sih. Te na ka liang ki bahaïing jong u, ki la ong ba ym dei ban tim sih hapoh shnong poh thaw, bad mar hangta hi kita ki briew ki la kynrup syndon bad shoh ïa ki.
Hadien kane, kita kiba shah shoh ki la phone ïa u bad ma u ruh da ka jingtieng ïoh ka jia eiei ïa ki, u la wan wut hangta ha jaka, bad ha ka por ba u poi hangta la dap u paidbhur ban shoh ïa kita ki bahaïing jong u, hynrei u la ong kaba i lyngngoh pat ban peit ba hangta la don da u Waheh Shnong u Bah Micky Lyngdoh, Secretary bad ki VDP hynrei kim shym la kren eiei ki shu peit kai ïa kata ka jingshah shoh kita ki khynnah samla.
“Da ka jingkulmar nga rung hangta hapdeng u paidbhur da ka jingthmu ban pynïakhlad hynrei nga la shah shoh pynban ha uta u paidbhur, bad hadien kata da ka jingtieng nga la kum bat ïa kaei re kaei katba ïoh hajan ban ïada ïalade bad ïa kita ki bahaïing hynrei uta u paidbhur u la nangtur ïa ngi hynrei hadien ngi la ïohlad ban phet na kata ka jingjia,” la ong u Bah Training.
U la ong ka jingthmu hi ka jong u (Training Phawa), ka long beit tang ban ïada ïalade bad ïa kita ki bahaïing hynrei kam shym long satia kumba la pharep lyngba ki kotkhubor, namar hadien kata ka jingjia ruh dei ma u (Training Phawa) hi ba ong shwa ba dei ban leit buh noh ïa uto uba mynsaw sha hospital namar ka jingthmu jong u (Training Phawa) kam shym long satia ban pynmynsaw ïano ïano hynrei tang ban pynkhlad na kata ka jingshah shoh.
U la ong ba kum u nongshong shnong u burom bad ieid eh ïa ki nongïalam shnong ba wat haduh ka step jong kato ka jingjia ruh u khlem kynthoh lane ujor pyrshah ïa ki, hynrei kaba sngewsih eh ban ïohi ba ma ki, ki ujor pynban bad pharep kylla ïa u, la ong shuh shuh u Bah Training.
Namar kata, u kyrpad ïa ki nongshong shnong bad kumjuh ïa kino-kino ki kynhun ba kim dei ban kynthoh palat pud khlem da tip ïa ka jingshisha kaba paka. Nangta u kyntu ruh ba ym dei ban bishar shiliang khmat hynrei ai ba ka aiñ kan leh ïa kaba donkam bad ai ba ka jingbishar ruh kan bishar ha kaba ïadei bad ka jingshisha, la pynkut ka kyrwoh na u Bah Training Phawa.
