Shillong, K’lyngkot 10
Ka National Thermal Power Corporation (NTPC) ka la dep ban pule bniah ïa kawei ka jaka na ka bynta ban tei ïa ka projek bording ka ban treikam da kaba shu tan um lane ‘Pump Hydro Storage’.
Ka tyllong khubor ka ïathuh ba ka NTPC ka la dep pule bniah ïa kawei ka jaka kaba kyrteng ka Diengsong ha East Khasi Hills district, bad la dep ruh ban phah ïa ka kaiphod (pre-feasibility report) sha ka Sorkar dang shen.
Ka NTPC ka la ïoh ban pule bniah lyngba ka jingai bhah ka Sorkar Pdeng ïa kane ka kompani ban pyndep ïa ki kam.
Mynta hadien ba la dep pule bniah bad phah ïa ka kaiphod, yn sa pynkhreh sa ïa ka Detailed Project Report.
Ka tyllong khubor ka ïathuh ba ïa kane ka projek yn sa bud katkum ki kyndon ka tnat bording ka Sorkar Pdeng.
La ong ba kum kane ka jingpule bniah ka shimpor ban pyndep namar ka kompani ka hap ban leh bun ki jinglum jingtip bad pynkhreh ïa ka kaiphod.
Ka Sorkar Pdeng ka la dep ithuh kumba 4 tylli ki jaka kiba biang ban tei ïa ka projek bording ‘Pump Hydro Storage’ kaba shu tan um ha kaba ka jingpynmih bording kan long kumba 3,100 MW lane 3.1 gigawatt.
