Khliehriat, K’Lyngkot:
U Pator Raymond Nartiang ka Raij Jowai hadien ka jingpyndep ïa ka lehniam ‘Ku Tyngkong’ ha Raij u Kongwasan Chyrmang, ha ka 9 tarik Kyllalyngkot, u la ïoh lad ban pyndep sa ïa ka lehniam ‘Ku Tyngkong’ ha Raij Tuber, East Jaiñtia Hills District.
Kane ka lehniam ka dei shi bynta ka rukom dustur ba dei ban pyndep shisien ha ka shi pateng Pator kynthup ha ka Raij u Langdoh Jowai, Raij u Langdoh Kongwasan Chyrmang, Raij u Langdoh Tuber bad ha Raij u Langdoh Ïalong.
Ïa kane ka lehniam ‘Ku Tyngkong’, u Pator ha Raij u Langdoh Tuber, la sakhi lang da u Dolloi ka Elaka Jowai, u Ma Puramion Kynjin ryngkat ki shakri niam ka Raij Jowai, Raij Chyrmang, Raij Ïalong bad Raij Tuber nalor ki ‘riew rangbah ka Seiñraij Jowai ba kynthup ia u Ma O.H.Toi, President Seiñraij Jowai bad kiwei-kiwei.
Ha kane ka sngi ki khun ka Raij Tuber da ka jingkmen ïa ka jingwan ïuh kjat u Pator, ha ka nongrim jong ka lehniam ‘Ku Tyngkong’, ki la pdiang sngewbha ïa u, da kaba ap naduh ka Lad ban leit sha Ïung Langdoh kaba don ha Tuber Kmaichnong ryngkat ka jingpyrta ban tip ki khun ka Raij ka Shnong ban ïawan lang sha Ïung Lyngdoh.
Ka bynta kaba bud jong ka jinglehniam ha kane ka sngi, ka dei da kaba leit sha ka jaka ba don u ‘Moo Pator’ na ka bynta ban pyndep ïa ka nguh ka dem bad ka suit ka shor bad la ïoh ruh ka jingkren na u Dolloi, u Pator bad na u Tymmen Raij ka Raij Tuber, u Woh Kiang Phawa.
Khatduh la pynkut ïa ka lehniam ‘Ku Tyngkong’ ha Ïung Langdoh da kaba pynsait kjat ïa u Pator da ka Langdoh shuwa ba un rung shapoh ka Ïung Langdoh bad pynbud ka Nguh Syiem Nguh Blei ryngkat ka suit ka shor da ka jingïashim bynta lang ki Soo Langdoh ryngkat ki shakri niam jong ki Soo Raij bad la pynkut da ka jingïalang kyntu kynpham na u Dolloi ka Elaka Jowai kum u khlieh ka niam khlieh ka Elaka.
