New Delhi, K’Lyngkot 10 (UNI)
Ka Congress ha ka Sngi Balang ka la kynthoh ba watla ka sorkar Manipur ka khlem ai jingbit ban sdang ïa ka jingïaid lynti (Bharat Jodo Nyay Yatra) ban ïalam da u Rahul Gandhi, hynrei kane ka jingïaid lynti kan sdang beit na Imphal ha ka 14 tarik Kyllalyngkot.
Haba kren sha ki lad pathai khubor, ki nongïalam ka seng, u KC Venugopal bad u Jairam Ramesh, ki la kynnoh ba ka sorkar Manipur ka la buh da ki diengpyngkiang da kaba ym ai jingbit ban sdang ïa ka jingïaid lynti na Palace Ground.
“Lehse ki tieng ïa kane ka jingïaid lynti,” la ong kitei ki nongïalam ka Congress.
U Venugopal u la ong ba ka Bharat Jodo Nyay Yatra, ban ïalam da u Rahul, kam dei ka kam saiñpyrthei bad wat lada ka sorkar Manipur khlem ai jingbit, kane ka jingïaid kan sdang na Imphal lada jia katba jia ha ka 14 tarik Kyllalyngkot. U la ong ruh ba ka seng ka dang peit da kiwei pat ki jaka bad ki nongïalam ka seng na Manipur ba kynthup ïa u Myntri Rangbah barim, u Okram Ibobi Singh, bad u President ka seng, u K Meghachandra, ki dang ïakren bad u Myntri Rangbah ka Manipur halor kane.
U Venugopal u la ïathuh ba u Myntri Rangbah, N Biren Singh, u la kohnguh da ka ktien ban ai da kawei pat ka jaka ban sdang ïa katei ka jingïaid lynti.
Lah ban kdew ba ka sorkar Manipur ka khlem ai jingbit ïa ka Congress ba kan sdang ïa katei ka jingïaid lynti na Palace Ground. U President ka Congress ha Manipur, u K Meghachandra, u la ïakynduh ïa u Myntri Rangbah ka Manipur ban pan jingbit ban sdang ïa ka jingïaid lynti na Palace Ground, hynrei u Myntri Rangbah u la kyntait ban ai jingbit, la ong u Venugopal.
U la ong ba ka sorkar Manipur bad ka BJP ki ju pynlong jingïalang ha Palace Ground, hynrei ym shym la ai jingbit pat ïa u Rahul Gandhi ban sdang ïa katei ka Yatra. “Kane ka pyni ba ki tieng ïa kane ka jingïaid lynti.”
Shuh shuh u Venugopal u la ong ba ka Congress ka la khot sngewbha ïa ki nongïalam ka kynhun synrop I.N.D.I.A ban ïashim bynta lang ha katei ka jingïaid lynti katkum ka jinglait por jong ki.
