Shillong, K’lyngkot 10
Ka Sorkar Jylla ka dang ap ïa ka Sorkar Pdeng lyngba ka tnat Tribal Affairs ban pyllait noh ïa ka bynta ba-ar ka baibam ki samla pule kaba dei ka ‘Post Matric Scholarship.’
Katkum ka jingïathuh u Myntri ka tnat pule puthi, u Rakkam A Sangma, la ong ba ka Sorkar Pdeng ka la dep pyllait teng ha ka bynta banyngkong (1st installment).
Baroh ki samla pule kiba dei ban ïoh ïa ka baibam (post matric scholarship) ki don 67,026 ngut bad baroh ka pisa na ka bynta u snem 2022-2023 ka long T. 1,180,150,955. Ka Sorkar Pdeng ka la mang ha ka bynta banyngkong kumba T. 523,344,592.
Kane ka umbrella scheme jong ka scholarship ka dei kaba pyntreikam da ka tnat pule puthi kaba la mang da ka tnat Tribal Affairs ka Sorkar Pdeng.
Kiba thep ban pynthymmai (renewal) ban ïoh ïa ka baibam ki long 25,512 ngut, bad ïa ka jingsiew la dep pyllait sha kumba 22,986 ngut jong u snem 2022-23 bad ka pisa baroh ka long T. 418,706,459 na ka bynta ki 22,986 ngut.
Ki bym pat ïoh ïa ka scholarship namar ki daw kiba ïadei bad ki bank ki don kumba 2,526 ngut.
Ki samla pule kiba dang thep thymmai (fresh applications) ban ïoh ïa ka scholarship ki long 14,420 ngut, bad ïa ka jingsiew la dep pyllait sha baroh 14,420 ngut.
Kiba dang sahteng ban ïoh ïa ka scholarship ki don sa 27,094 ngut.
Lada kheiñlang baroh, ka pisa kaba la pyllait na ka bynta ki samla kiba thep thymmai bad kiba shu pynthymmai ban ïoh ïa ka scholarship ka long T.346,808,591 bad baroh kiba la ïoh ïa ka scholarship ki long 37,406 ngut haduh mynta na ki 67,026 ngut.
