Nongstoiñ, K’Lyngkot 10
Ka Synjuk ki Nongsynshar Shnong Nongmynsaw Syiemship kaba ïeng na ka bynta ki paidbah nongshong shnong ka thaiñ Langpih hapoh ka Hima Nongmynsaw Syiemship kaba long kawei na ki jaka ïakajia pud hapdeng ka Meghalaya bad Assam ka la pynpaw ïa ka jingsngew lynga hadien ba kam ïohi shuh ïa ki sienjam ba ka Sorkar kan shim halor ka kam ïapynbeit pud bad ka Assam.
Ki nongkitkam kane synjuk kiba kynthup ïa u Bah Teiborlin Nonglang kum President bad u Bah Sebilin Lyngdoh kum Secretary ki la ïathuh ba halor katei ka bynta ha ka Sngi Balang jong ka taïew, ki la leit ban ïakynduh ïa u Deputy Commissioner ka West Khasi Hills ba lyngba jong u, ki la aiti ïa ka jingthoh sha u Myntri ka Sorkar Jylla u Bah Paul Lyngdoh uba long u Chairman ka Regional Committee ka West Khasi Hills.
Ki nongïalam jong ka synjuk ki la ong ba katkum ka jingthoh ba la aiti sha u Chairman ka Committee lyngba u DC, la pynpaw ba katei mat ka dei kaba la sah slem eh haduh katta katta kaba kum ki paidbah nongshong shnong kiba shong ha ki thaiñ khappud ki la thrang bad angnud dik-dik ban pynbeit noh ïa u pud u sam.
Nalor nangta ka pynpaw ruh ba halor katei ka mat kum ki nongïalam shnong ha ka sur ki paidbah nongshong shnong ki wan ban buh ïa ka jingpynkynmaw ban thaw ki lad ki lynti ban pynkloi noh ïa kane ka kam.
Ka jingthoh ka la pynpaw ruh ba halor kane kajuh ka mat, kum ka thaiñ ka la ju thoh la bunsien ïa ki mat jingdawa ban pynneh pynsah ïa ka Langpih Sector hapoh ka jylla Meghalaya kaba long halor kine ki nongrim ba la kdew, ba ka dong ka thaiñ ha Langpih hapoh ka Hima Nongmynsaw Syiemship ka dei ka thaiñ ba kiba bun ki nongshong shnong ki dei na ka jaidbynriew Khasi bad Garo kiba dei hok ki nongshong shnong ba pura hapoh ka Jylla Meghalaya.
Nangta, la pynpaw ruh ba katkum ka jinghiar pateng ki Khasi bad Garo ha kane ka thaiñ, la im la shong la sah la bun pateng bynriew bad da ki spah snem kiba ki dang bat ïa ka riti ka dustur, ka ktien ka thylliej tynrai la ka jong kum ki Khasi bad Garo bad ha ka synshar khadar ruh ka dang shah synshar haduh mynta hapoh ka jylla Meghalaya.
Shuh shuh ka jingthoh na ka synjuk ka la pynpaw ruh ba kum ki paidbah kim kwah ba ka jaka jong ki kan shah pynhap noh sha Assam hynrei ki kwah ban hap hapoh u pud u sam ka Meghalaya.
