Nongstoiñ, Kyllalyngkot:
Ka Auxilium Roilang Institute for Sustainable Empowerment Pyndengrei (ARISEP) Nongstoiñ ha ka Sngi Ba-ar jong ka taïew ka la ïoh ban sam ïa ki kor suhjaiñ sha ki khynnah kiba la pyndep ïa ka jingshah hikai na katei ka shlem.
Ïa ka jinghikai ha katei ka shlem la bei pisa da ka Meghalaya State Skills Development Society hapoh ka tnat Labour. Mynta ka kynti ki don haduh 26 ngut ki khynnah kiba la pyndep ïa ka jingshah hikai bad ïoh ruh ïa ki syrnod lyngba ka jingithuh jong ka RADIANT INFONET NEW DELHI ha katei ka sngi ki la ïoh lang bad kor suhjaiñ.
Shuh shuh ha katei ka shlem ki don ruh sa 24 ngut ki khynnah thymmai kiba la sdang ïa ka jingshah hikai.
Ha katei ka sngi la pynlong ruh ïa ka jingïalang ha phyllaw jong ka ARSTC Nongstoiñ Pyndengrei ha kaba u Bah Ewanmi Lyngdoh, MCS u la long kum u kongsan bad ka Kong Memorial Khongkai, Skills Development Officer ka West Khasi Hills District kum ka symbud kongsan ha ryngkat ka jingïadonlang ki sister, ki brother bad u Bah Michael Marweiñ sordar shnong Pyndengrei bad kiwei kiwei.
“Ka ophis ka angnud ruh ba ynda la dep ïa ka jinghikai, ngi kwah ba phin trei ym ban shu buh ïa kito ki jingnang jingtip, ba kin sarang ha kyndong, kynmaw ba kine ki kor ba phi ïoh ym dei ban shu buh ha kyndong,” ong ka Kong Memorial.
Ka Kong Memorial ka la ong ruh ba ka jingangnud jong ka tnat ban ai ïa ki kor suhjaiñ hadien ba ki la dep ïa ka jinghikai ka dei ba ngim kwah shuh ban ïoh sngew ba ki khynnah, ki briew jong ngi ynda ki la dep ka jinghikai kin ym lah ban sdang ïa ka jinghikai.
“Na ka liang ka ophis, ka la buh ruh ïa ka kyndon ba ki khynnah kiba shah hikai kin buddien ïa phi, kin sa phone kin sa kylli phi la trei aiu phi la leh aiu, nangta na ka liang ka tnat ba dei peit jong ka sorkar ka ju pynlong ruh na ka por sha por ïa ki jingpyni nam ïa ka sap kum ki mela khnang ba ïa kita ki sap kaba phi la don phin pyni nam hangta ki rynsan bad phi lah ban ïadie ïa thied bad phi lah ruh ban ïakynduh ïa kiwei pat ki briew kiba lah ban kyntiew shuh shuh ïa ka sap ka jong phi,” ka la ong, bad kala kyntu ba ym dei ban shu shong hynrei ynda la ïoh ïa ki kor dei ban sdang ïa ka kam bad ym kwah ba ka mynsiem ban trei ka jong phi kan pjah noh.
