Nongstoiñ, K’Lyngkot 10
Ha ka 5 tarik u Kyllalyngkot 2024, ka ïingbishar u Special Judge POCSO, Nongstoiñ ka la rai pynrem ïa u Pynshailin Sangriang da kaba set patok haduh 7 snem ha ryngkat ka kuna kaba T.20,000.
Katkum ka kyrwoh khubor ba la phah la ong ba ka jingrai pynrem ïa u Pynshailin Sangriang ka dei hadien ba ka ïingbishar ka la lap lyngba ki sakhi sabut halor ka jingdonkti ka jong u ban thombor ïa ka longrynïeng jong kawei ka heprit kaba dang 13 snem ka rta bad ka ïingbishar ka la pynngat ruh ïa utei u runar ha ka kyndon 4 jong ka POCSO Act.
Shuh shuh ka kyrwoh khubor ka la pyntip ruh ba katei ka jingjia ka la jia ha ka 25 tarik u Naitung 2018 ha kaba ki pulit ka Nongstoiñ ki la ïoh pdiang ïa ka ejahar na ki bahaïing jong katei ka heprit halor ka jingthombor ka jong u ïa katei ka heprit ha kaba ki pulit ki la kem noh ïa utei u briew bad pynrung ïa ka case katkum ka case number 61(07) 2018 u/s 7/8 POCSO Act bad la Chargesheet ïa ka case da ka Investigating Officer hapoh ka kyndon 3(A)/4 POCSO Act.
Sa ha kawei pat ka khubor, ka ïingbishar u Special Judge POCSO, Nongstoiñ mynha ka 3 tarik u Kyllalyngkot 2024 ka la rai pynrem ïa u Slander Mawleiñ da kaba set patok haduh 10 snem ha ryngkat ka kuna kaba T.30,000 hadien ka jinglap ba u dei uba donkti ban thombor ïa ka longrynïeng jong ka heprit ba dang 10 snem ka rta.
Ka khubor ka ong ruh ba ka ïingbishar u Special Judge POCSO ka la pynngat ruh ïa utei u runar ha ar tylli ki kyndon, kata ka kyndon 6 jong ka POCSO Act bad kumjuh ha ka kyndon 506 Part-1 IPC kaba yn shah pynsaja biang sa 1 snem ha along ryngkat ka kuna kaba T.5,000.
Nangta, ka kyrwoh khubor ka ong ruh ba katei ka jingjia ka dei kaba la jia naduh ka 7 tarik u Nohprah 2018 ha kaba ki bahaïing jong katei ka heprit ki la leit ban ujor sha thanat Nongstoiñ ha kaba la pynrung ruh ïa ka case hapoh ka thanat Nongstoiñ katkum ka case Number 99(12)2018 u/s 506 IPC R/W 5(m)(n)/6 POCSO Act, bad la Chargesheet ïa katei ka case da ka Investigating Officer hapoh ki kyndon 506 IPC R/W Sec 5(m)(n)/6 POCSO Act.
