Shillong, K’lyngkot 10
U Myntri ka tnat pule puthi u la khot la wer ïa baroh ki nonghikai ban ai ka jingshakri kaba bha tam eh ban sam ïa ka jingnang jingstad na ka bynta ban kyntiew ïa ka pule puthi ha kane ka Jylla. U la ong ruh ba kito ki nonghikai ki bym sngewtynnad ban hikai, ki dei ban shu shongthait mon sngewbha ha kaba la mana ruh ïa kito kiba shu phah hikai pateng ha kiwei pat.
Haba phah ka khubor sha ki nonghikai ban shim ïa ka kam da ka jingkitkhlieh na bynta ka lawei ki khynnah bad samla, u Rakkam u la maham ïa kito kiba shu bynshet ha kiwei da kaba thung beaiñ ïa ka kam hikai ha ki skul Sorkar kum ki Lower Primary ha kane ka Jylla.
“Ngin nym shah da lei lei ruh ïa kane ba kan jia bad ki ophisar kin sa lap beit ïa kum kita ki nonghikai kiba leh beaiñ bad pyntikna ba kin pyndep ïa ka kamram kum ki nonghikai. Lada phi ieh bad khlem leh ïa ka kamram phi pynjot ïa ka lawei ki heprit na ka dong ka thaiñ jong phi hi,” la ong une u Myntri ka tnat pule puthi.
U la ong ba ïa ka lawei ka Jylla yn rai da ka jinglong jingman ka pule puthi bad lada ki ïoh ka jinghikai kaba bha tam eh kin mih ruh ki samla kiba biang. Kumta u la ong ba ki nonghikai ki hap shim ka jingkitkhlieh kum ki nongtei ïa ka lawei ki hep barit bad ki samla bad shakri da ka jingsngew long trai na ka bynta ki briew ka Jylla.
“Lada ïoh ki jingujor ba ki don ki nonghikai kiba shu phah hikai pateng ha kiwei ha ryngkat ki sakhi, yn sa leh ïa kaba donkam. Kito kiba mlien ha kum kita ki kam beaiñ bad kim sngewtynnad ban hikai, ka bha ba ki iehnoh kam bad shongthait noh da ka mon sngewbha, nangta la leh ïa kiwei pat ki kam kiba ki sngewtynnad bad ki don ka sap ban trei,” la ong u Myntri da ka jingsngewkhia.
U Rakkam u la ong ba shen un sa lum ïa ka jingïalang ban ïakren ïa kane ka mat bad yn bthah ruh ïa ki Deputy Commissioner bad ki ophisar ka tnat pule puthi ha ki district ban pyntikna ba ki nonghikai ki dei ban leit sha skul ban hikai da ka jingkitkhlieh ïa ka kam kaba la bynshet ha ki.
