Shillong, K’Lyngkot 10
Ka jylla-niam bah Shillong jong ka Balang Katholik kan plie ïa san tylli ki Parish bathymmai bad ïa kane la pynbna da u Lyngdohsad (Archbishop), u Most Rev. Victor Lyngdoh.
Kine ki san tylli ki Parish ki dei ki ban phiah na ka Parish Mawlai bad Parish Nongthymmai.
Ha ka shithi, u Lyngdohsad u la ong ba ha ka Sngi Ba-Ar ka la don ka jingïalang bad ki dkhot ka Council (Jylla-Niam Bah), ki Parish Priest ka Mawlai bad Nongthymmai bad ki Rangbah Balang ha kaba la rai ban plie ïa san tylli ki Parish.
Kine ki Parish bathymmai ki kynthup ïa ka Parish Mawïong, Mawtawar, Umpling, Nongrah bad Madanrting. Ïa ka Parish Mawïong bad Mawtawar yn pynïakhlad na ka Parish Mawlai katba ka Parish Umpling, Nongrah bad Madanrting na ka Parish Nongthymmai.
“Ha ka jingïaid lynti jong ka Balang, ngi ïohi ïa ka jingdonkam ban sumar la ka jingim mynsiem jong ki parabangeit ha ki jaka ba bun jong ka Jyllaniam Bah. Ngi ainguh ïa U Blei na ka bynta ka jingïaid shaphrang jong ka Balang ha kane ka Jylla-Niam Bah Shillong. Katba ka Balang ka nangroi, ka don ka jingdonkam ban sumar ïa ka jingim mynsiem jong ki parabangeit ha ki jaka ba bun jong ka Jylla-Niam Bah,” la ong u Lyngdohsad ha ka shithi.
Nalorkata, u la ong, “Ngi da sngewnguh shikatdei eh ïa ki Lyngdoh, ki Riewniam, ki Nongtrei Balang bad ki parabangeit baroh kiba la aiti met bad mynsiem ban pynïaid shaphrang ïa ka Balang Bakhuid jong U. Ka dei ka jingduwai bad ka jingangnud jong kiba bun ban plie ïa ki Parish ha kylleng ka Jyllai-Niam Bah na ka bynta ka jingsumar ba kynja mynsiem. Ka bynta banyngkong jong ka jingpynroi ïa ki Parish kan sa ïaid shakhmat.”
“Nga kyrpad ïa phi baroh ban duwai kyrpang katba ngi dang pynkhreh ïa ka jingplie paidbah ïa kitei ki Parish thymmai,” la bynrap u Lyngdohsad.
