Shillong, K’lyngkot 10
Ki kot pule jong ki khynnah skul ha kane ka Jylla kiba dei ban bud katkum ka National Council of Educational Research and Training (NCERT) yn sa shon bad sdang pyndonkam shwa ha ki lai tylli ki sobjek, kita, ka sobjek Jingkheiñ (Mathematics), sobjek Phareng (English) bad sobjek Saïan (Science).
Ki kot pule jong kiwei pat ki sobjek yn sa pyndonkam pura ha u snem 2025.
Haba ïakren bad u Myntri ka tnat pule puthi ka Jylla, u Rakkam A Sangma u la ong ba ïa mynta ki kot pule kin dei shwa tang ïa kitei ki lai tylli ki sobjek wat lada ka Jylla ka la dep mynjur ban pyndonkam naduh klas-I haduh klas-XII.
Hynrei u la ong ba ïa ka sobjek Jingkheiñ lah ban pyndonkam wat naduh klas-I namar bym da donkam eh ban pynkylla hynrei kan ïaid kumba la don lypa ha ki kot pule jingkheiñ NCERT.
U Rakkam u la ong ïa ka sobjek Phareng bad Saïan ruh ym da donkam eh ban wanrah ki jingpynkylla bad yn sa pyndonkam ïa ki kot naduh ba sdang long skul mynta u snem.
Haba ïathuh ba kam long kaba suk ban leh lut shisien leh ïa ki kot pule jong baroh ki sobjek, u Rakkam u la ong ba naduh u snem 2025 ka la biang bad lah lut ban pyndonkam pura ïa ki kot pule katkum ka NCERT.
Haba kylli lano yn pyllait ïa ki kot pule NCERT, u Rakkam u la ong ba ha ka jingshisha, la dep pynbeit ïa ka sngi ban pyllait ïa ki kot pule ha ka 16 tarik mynta u bnai, hynrei namar ka jingwan ka President sha kane ka Jylla, yn sahteng shwa ka jingpyllait kot bad yn sa leh pat la kumno kumno hadien ka jingrakhe Republic Day.
Kum ban pynkynmaw, ka Sorkar Jylla ka la rai ban pdiang noh ïa ki kot pule kiba dei ha ka kyrteng jong ka NCERT naduh klas-I haduh klas-XII bad ïa ki kot pule jong ki khynnah klas-I haduh klas-V yn hap ban pynbeit katkum ki jingdonkam khamtam ban shon ïa ki kot ha ki ktien kiba kren ha kane ka Jylla kum ka ktien Khasi bad Garo.
Ka rai ban pynrung da ki pule NCERT ka long ban kham pynjanai ïa ki lynnong kot khamtam ban ïa beh lang sha ka thong bad kiwei pat ki khynnah skul kiba ju pule da ki kot pule NCERT ha kiwei pat ki Jylla jong ka ri.
