Shillong, K’Lyngkot 11
Ka Khasi Students’ Union (KSU) lyngba ka Employment Monitoring Cell ha ka Sngi Palei ka la leit buh da ka dorkhas sha u Director (Corporate Affairs) jong ka MeECL halor ka jingslem na ka liang ka MeECL ban thung ïa ka kam Assistant Engineer (Electrical/Mechanical).
Ha ka dorkhas ba la soi da u samla Reuben Najiar uba dei u Chairman ka Employment Monitoring Cell bad u samla Manly Nongpluh uba long u Secretary ki la pyntip ba ïa kane ka ‘post’ Assistant Engineer (Electrical/Mechanical) ki la pyndep ïa ka eksamin (written examination) ha ka 13 tarik Naitung, 2019 bad la pynmih ïa ka result ha ka 19 tarik u Nailar, 2019 ha kaba la jied ïa 24 ngut ki ban hap leh ïa ka interview (personal interview) ha 26 tarik u Nailur, 2019. Phewse shuwa kata ha u 22 tarik u Nailur 2019 ki la pynpep noh ïa kane ka interview bad la 4 snem tam kim shym la lah shuh ban pynurlong ïa kane ka kam.
Ka seng haba ïakren bad ki bor pynïaid jong ka MeECL, ka la ïoh jingtip ba ka MeECL kam shym la lah ban thung kam ïano ïano ruh naduh u snem 2020 namar bym don pisa ban siew tulop bad ïa ki post ba kyrkieh ba donkam la shu thung kontrak (contractual basis).
Ka seng lyngba kane ka kyrwoh ka kwah ban buh dak jingkylli ïa ka Sorkar Jylla, khamtam eh ïa ka tnat Power ba kaei ka sienjam ba ka la shim ban pynbeit ïa ki kynrum-kynram ha MeECL bad kumba ka long mynta kaei ka lawei jong ka MeECL.
Ka Seng ka dawa na ka Sorkar Jylla ba ka dei ban shimkhia halor ka thung kam thung jam ha ka MeECL bad kumjuh ruh ban pyllait ïa ka tulop jong ki nongtrei ka MeECL, namar mar ïa mih na ka jingïakren, la wan ki nongtrei MeECL ban pynsngew sha ka seng ba haduh mynta ym pat pyllait ïa ka tulop ka jong ki.
