Shillong, K’lyngkot 11
Ka Akhil Bharatiya Vidyarthi Parishad Meghalaya (ABVP) ka la dawa jingpynshai na ka tnad pule puthi hadien ba ka ‘result’ kaba la mih na ka bynta ka kam kaba la thep jong ka post Assistant Teacher hapoh ki Lower Primary School jong ka sorkar la ïohi ba ym don satia ki kyrteng jong ki paid riewlum kiba la paw ha ka result lyngba ka General Category.
Ïa katei ka ‘result’ la pynmih da ka tnad pule puthi jong ka Dadenggre Sub-Divisional School Education Officer jong ka West Garo Hills District ha ka 10 tarik mynta u bnai jong ka kam Assistant Teacher ha ki skul sorkar. La ïohi ba ïa katei ka kam la pass tang na kawei ka jaitbynriew kata ki Muslim bad ki kyrteng jong ki jaitbynriew Garo ki khlem paw satia ha katei ka ‘result’.
Ka ABVP ka la buh jingkylli kumno ki trai jylla ki khlem pass ïa katei kam wat la uwei ne kawei ruh ki khlem pass satia ïa katei ka kam hynrei kumno la pass ïa katei ka kam tang da kawei ka jaitbynriew kaba la pass haduh 33 tylli ki kam na ki 34 tylli. Kumta ka ABVP ka la dawa ba ka tnad pule puthi ka dei ban ai jubab halor jong kane.
U Tengku M Marak, State Secretary ka ABVP Meghalaya u la dawa ba ka sorkar ka dei ban thung ïa ka jingtohkit halor kane khnang ba ki trai shnong jong ka jylla kin ïoh ïa ka hok.
U Marak u la ong ba lyngba ka jingpynmih ïa ka ‘result’ ka la wanrah shibun ki dak jingkylli bad ka sorkar ka dei ban pynsangeh noh shwa shisyndon ïa ka tad haduh ban da thung da ka jingtohkit halor kane ka kam kaba ym sngew don jingïahap namar kumno ki paid riewlum kim shym la ïoh ne mih kyrteng ha katei ka kam hynrei kumno pat la mih kyrteng tang da kawei ka jaitbynriew kaba la lah ban paw kyrteng ha ka ‘result’.
Ki don 34 tylli ki post hapoh ka General Category ha kaba 33 tylli ki post la mih kyrteng jong kiwei ki jaitbynriew.
Lyngba ka jingpynbna ka tnad pule puthi ha Daddengre ïa ka ‘result’ ha ka 10 tarik u Kyllalyngkot 2024, ka la kdew ba katkum ka ‘Interview’ kaba la pynlong ha ka 13, 14, 15, 19, 20 bad 21 tarik u Nohprah 2023 bad ha ka 4, 5, 6 bad ha ka 8 tarik u Kyllalyngkot 2024 katkum ka jingbud ryntih ïa ka Roster System jong ka State Reservation Policy la pynbna ïa katei ka ‘result’ na ka bynta ki Khasi bad Garo bad ki kam ki bym mang kyrpang.
