Shillong, K’Lyngkot 11
Ka sor Shillong ka la ïoh ïa ka kyrdan kaba 436 napdeng ki 446 tylli ki sor ha ka jingkhuid jingsuba.
Kine ki 446 tylli ki sor ki dei kiba don palat 1 lak ngut ki nongshong shnong. Ha ka Sngi Palei, ka Ministry of Housing & Urban Affairs jong ka Sorkar Pdeng ka la sam ïa ki khusnam Swachh Survekshan jong u snem 2023 ha nongbah New Delhi ha kaba ka President jong ka Ri India ka Droupadi Murmu ka la long kum kongsan.
Ki sor kiba khuid tam ki kynthup ïa ka Indore kaba don ha ka jylla Madhya Pradesh bad ka Surat kaba don ha Gujarat bad ka sor kaba wan ba lai ka dei ka Navi Mumbai ha Maharashtra. Ka sor kaba wan sha trai duh ka dei ka Haora kaba don ha West Bengal.
Katkum ka kaiphod jong kane ka Swachh Survekshan 2023 na ka bynta ka Shillong, ka jinglum ïa ki jaboh jabaiñ na ki ïing ki sem ka long 26 na ka 100, ka jingpynïakhlad ïa ki ñiut hapdeng kiba pyut bad bym pyut ka long tang 2 na ka 100, ka jingkhuid ki jaka ba sah briew ka long 54 na ka 100, ka jingkhuid ki jaka ïew ka long 53 na ka 100, ka jingkhuid ki um ki wah ka long 100 na ka 100 bad ka jingkhuid ki jaka leit bar kiba long paidbah ka long 33 na ka 100.
Kaba pynlyngngoh na ka kaiphod halor ka Shillong ka long ka jingkam ba ki um ki wah ki long kiba khuid 100 na ka 100 watla baroh ki sakhi ïa ka jingjaboh jong ka Wah Umkhrah bad ka Wah Umshyrpi kiba tuid na kane ka nongbah.
Haba kheiñ kyllum, napdeng ki 27 tylli ki jylla, ka Meghalaya ka la wan ha ka kyrdan kaba 21.
Shuh shuh ka sor Tura ka la wan nyngkong napdeng ki 8 tylli ki jaka sor ha Meghalaya. Lait noh ïa ka Shillong, kine ki phra tylli ki jaka sor ki long ka Tura, Baghmara, Nongstoiñ, Resubelpara, Mairang, Nongpoh, Williamnagar bad Jowai.
