Mairang, K’Lyngkot 11
U District Magistrate jong ka Eastern West Khasi Hills District, Mairang u Bah G Kharwanlang, IAS, u la pyntreikam da ka kyndon 144 CrPC kaba khang bad mana pyrshah ïa ka jingtih bad khlong maw beaiñ ha shi lynter ka surok Tiehnongbah-Laitnongrim.
Ha ka kyrwoh khubor ba la phah, u District Magistrate u la ong ruh ba kane ka jingtih bad khlong maw beaiñ ka wanrah ka jingpynjot pynsniew ïa ka surok bad ka wanrah ruh ïa ka jingma ïa ki nongshong shnong bad ki briew kiba ïaid lynti na kane ka surok.
Shuh shuh, u la mana jur ruh ba kino-kino kiba ïaleh pyrshah ïa katei ka hukum yn pynshitom katkum ka kyndon 188 jong ka Indian Penal Code. La ong ruh ba kane ka hukum kan treikam mardor tad haduh ynda pynbna da kumwei pat.
