Shillong, K’lyngkot 11
Ka nongïalam ka All India Congress Committee (AICC) kaba dei ka nongaiktien bad ka ophisar shipai liengsuiñ kaba la shongthait ka Anuma Acharya, ka la ther ïa ka BJP kaba la leh ki kam bymhok ïa ki paid nongshong shnong jong ka ri ha kine ki palat 9 snem bad ka la ong ba ka jingkam jong ka BJP ba kan jop palat 400 ngut ki MP ha ka ilekshon ka ban wan ka dei ka jingkam kaba ka BJP ka shim ba wat ka Election Commission of India (ECI), Enforcement Directorate (ED), Central Bureau of Investigation (CBI) ki la dei ki dkhot jong ka.
Ka Acharya ka la kren ïa kane ha ka Sngi Palei ha Congress Bhavan haba ka wan ban pynbna ïa ka Bharat Jodo Nyay Yatra ka ban sa lamkhmat da u nongïalam ka Congress u Rahul Gandhi ka ban sdang na Manipur ha ka 14 tarik mynta u bnai. Kane ka jingïaid ban ïalap kan kynthup lang ïa ki Jylla ha ka thaiñ Shatei Lam Mihngi ha ki 66 sngi.
Kane ka Yatra kan long 6700 Km lyngba ki 110 tylli ki district tad haduh ban poi sha Mumbai ha ka 30 tarik Lber.
Ka Acharya ka la ong ba ka BJP ha kine ki 10 snem duna ba ka synshar, ka la leh ki kam bymhok kiba ktah ïa ka jingsngew jong ki paidbah bad ïa ka synshar paidbah bad ka Riti Synshar jong ka ri.
Ka Acharya ka la kren ruh shaphang ka jingkyrduh kam, ka jingkiew dor ki mar ki mata, ka jingbym lah tehlakam ïa u COVID, ka jingban beiñ ïa ki ritpaid naduh ki Dalit, Adivasi, Khristan, bad ka jingkwah ban pyrshah ïa ka caste census.
Ka la ong ba wat ki bor shipai kiba dei ban ïada ha khappud ki kylla ‘langkñia ha kaba ka BJP lyngba u Myntri Rangbahduh u Narendra Modi ki la aiti sha ka China da ka jingïap ki shipai kumba 20 ngut ha Galwan Valley.
Kumta ka la ong ba ka BJP ka la don ïa ka jingangnud ba ki samla kin nym ïoh kam hynrei kin ïoh myntoi tang kiba heh spah.
Ka la ong ba ka jingdon ki bym ïoh kam ka la poi sha ka 4 klur bad bun ki jingeh ba ki paidbah ki mad naduh ka jingkiew dor ki mar, ka jingshah thombor ki kynthei, ki ritpaid nalor ki Dalit, ki Adiwasi bad kiwei.
Kumta ka Acharya ka la ong ba ki briew ki la sngewthuh bad kin sa pynsawa ka sur da kaba wan lang ban pyni ha kane ka ilekshon Lok Sabha lyngba ka Bharat Jodo Nyay Yatra kaba ïalam da u Rahul Gandhi.
Ka ong ba ka Congress ka la leh bun kiei kiei naduh ka skhim MGNREGS ka Food Security Act bad kiwei ki skhim ban myntoi ki paidbah katba ka BJP ka kyrshan tang ïa ki hehspah katto katne ngut.
