Shillong, K’Lyngkot 11
Ka Khun Hynñiewtrep National Awakening Movement (KHNAM) ka don ïa ka jingthmu ban pynïeng kyrtong ha baroh 29 tylli ki konstitwensi ha ka ilekshon MDC ka ban sa long shen.
“Kum ka KHNAM, ngi don ka jingthmu ban pynïeng kyrtong ha baroh ki konstitwensi ha ka ilekshon MDC, tangba ngi donkam pat ban ïoh ïa ki kyrtong ne ki briew kiba biang bad kiba don ka mynsiem ïai shah bad skhem jingmut,” la ong u Working President ka KHNAM u Bah Thomas A Passah haba kren sha ki lad pathai khubor.
U Bah Passah u la ong, “Ngi kum ka seng wat la ngi la buh jingmut ban pynïeng kyrtong ha baroh 29 tylli ki konstitwensi, hynrei ban ïoh ïa kane, ngi donkam pat ban ïoh ïa ki briew kiba biang, kiba don ka mynsiem ïai shah bad skhem jingmut, namar baroh ki tip hapoh district council kam don satia ka aiñ kyntiap seng ne kata ka Anti Defection Law, kaba ailad pat ïa kito kiba la jop ban kynthih ne ryngkang dieng kper nawei shawei.”
U la ong ba ka jingpynkhreh ka KHNAM na ka bynta ka ilekshon MDC ka la ïaid bad ha u snem ba la lah, kata ha u bnai Risaw, kata ha ka jingïalang ka CEC ka KHNAM la dep ban thaw ïa ka Election Committee, bad Chairman la thung ïa u Bah James MA Neng. “Ngi la ïoh pdiang katto katne ki aplikeshon na ki konstitwensi bapher bapher bad don kiba la wan ïakynduh ïa ngi ruh hynrei haduh mynta ngim pat shim rai namar na ka liang ka Election Committee kam pat phah ïa kita ki jingtyrwa bad na ka liang ka CEC ngi dang ap ba ka EC kan pyndep ïa ki kam jong ka,” la ong u Bah Passah.
Shuh shuh u la ong, “Haba ngi ong ban pynïeng 29 ngut, ka mut ngi hap ruh ban ïoh baroh 29 ngut ki briew kiba biang, namar kan nym don jingmut ban ong pynïeng 29 bad ai tiket ïa ki briew ki bym biang ruh namar kan buh jingeh pat ha council ka bym don ka aiñ kyntiap seng, kumta ngi donkam ban peit bniah bad peit shwa ïa ka nongrim ba hato ki don ne em ïa ka jingïai shah ka jingïai neh, khnang ba ka jingshakri ka jong ngi pat ba lada ngi jop ngi wan sha ka bor, ngin lah ban pyndep hok ïa kaei kaei kaba ngi la ju kular ïa ki paidbah na ka por sha ka por.”
